Fransa Qrenlandiya ilə əməkdaşlığı genişləndirir
Paris, 7 sentyabr, AZƏRTAC
Fransa və Qrenlandiya turizm, mədəniyyət və elmi-tədqiqat sahələrində əməkdaşlığın genişləndirilməsi barədə iki niyyət bəyannaməsi imzalayıb. Sazişlər Fransa və Qrenlandiyanın müvafiq rəsmilərinin iştirakı ilə imzalanıb.
AZƏRTAC xəbər verir ki, turizm üzrə əməkdaşlığın əsas məqsədlərindən biri Qrenlandiyada yerli icmaların maraqlarını nəzərə alan turizm modelinin inkişaf etdirilməsidir. Hazırda Qrenlandiyaya ildə təxminən 100 min turist səfər edir. Yeni hava limanı infrastrukturu və Arktika kruizlərinin inkişafı ilə turist axınının artacağı gözlənilir.
Fransanın turizm üzrə naziri Serj Papin Qrenlandiyanın həssas qütb ekosistemlərini nəzərə alaraq turizmin inkişafı ilə təbiətin qorunması arasında tarazlığın vacibliyini vurğulayıb.
Turizmlə yanaşı, tərəflər mədəniyyət və elmi-tədqiqat sahələrində əməkdaşlığın dərinləşdirilməsini nəzərdə tutan ayrıca niyyət bəyannaməsi də imzalayıblar. Fransa rəsmiləri bu sənədləri Paris və Nuuk arasında əməkdaşlığın genişləndirilməsi istiqamətində konkret addım kimi qiymətləndiriblər.
Bölmənin digər xəbərləri
