Fransada meşə yanğınları ilə bağlı 402 nəfərin saxlanıldığı açıqlanıb
Paris, 5 avqust, AZƏRTAC
Fransanın daxili işlər naziri Loran Nünez ölkədə baş verən meşə yanğınları ilə bağlı aparılan istintaq çərçivəsində indiyədək 402 nəfərin saxlanıldığını bildirib.
AZƏRTAC xəbər verir ki, nazir Fransanın bir neçə regionunu əhatə edən yanğınlarla bağlı keçirilən brifinqində deyib ki,
saxlanılan şəxslər qəsdən və ya ehtiyatsızlıqdan yanğın törətməkdə şübhəli bilinirlər.
Loran Nünez yanğınların son dərəcə güclü olduğunu vurğulayaraq, xüsusilə küləkli hava şəraitinin alovun sürətlə yayılmasına səbəb olduğunu və fövqəladə xidmətlərin vəziyyəti nəzarətdə saxlamaq üçün səfərbər edildiyini vurğulayıb.
Qeyd edək ki, ən çox zərər görən departamentlərdən biri olan Varda bir neçə yanğın ocağı hələ də diqqətlə izlənilir. Prefektin verdiyi məlumata görə, Korans kommunasının ərazisinin 52 faizi alovdan zərər çəkib.
Bu arada, qəsdən törədilmiş yanğın şübhələri ilə əlaqədar bəzi bələdiyyələr profilaktik tədbirlər görüb. Ameli-le-Ben-Palalda kommunasında mer yaşı 15-dən az olanlar üçün sentyabrın 1-dək komendant saatı tətbiq edib.
Xilasetmə və təhlükəsizlik qüvvələri yanğınların fəsadlarını minimuma endirmək və alovun yaranmasına səbəb olan şəxsləri müəyyənləşdirmək məqsədilə fəaliyyətlərini davam etdirir.
Bölmənin digər xəbərləri
