Füzulidə “Böyük Qayıdışın İstedadları” layihəsi çərçivəsində tədbir təşkil olunub
Bakı, 30 may, AZƏRTAC
Ulu Öndər Heydər Əliyevin anadan olmasının 101 illiyinə həsr olunmuş “Böyük Qayıdışın istedadları” layihəsi çərçivəsinə mayın 30-da Füzuli rayon Kurmanqazı adına Uşaq Yaradıcılıq Mərkəzində Füzuli və Ağdam rayonlarının uşaq musiqi və incəsənət məktəbləri şagirdlərinin iştirakı ilə konsert, sərgi və bədii qiraət müsabiqəsi keçirilib.
Mədəniyyət Nazirliyindən AZƏRTAC-a bildirilib ki, tədbirdə iştirakçılar tərəfindən Qarabağın təbiət gözəlliklərini vəsf edən peyzaj nümunələrinin sərgisi təşkil edilib, məktəblərin şagirdlərinin ifasında vətənpərvərlik və xalq mahnıları ifa olunub.
Layihə çərçivəsində həmçinin uşaqlarda vətənpərvərlik hisslərini daha da artırmaq, nitq mədəniyyətini formalaşdırmaq və bədii qiraət sahəsində istedadlı şagirdləri müəyyənləşdirmək məqsədilə bədii qiraət müsabiqəsi keçirilib. Müsabiqə iştirakçılarının ifalarında səsləndirilən şeirlər münsiflər tərəfindən qiymətləndirilib. Tədbir zamanı peşəkar fotoqraf tərəfindən uşaqlara təbiət mənzərələrini çəkmək üçün dərslər keçirilib.
Qeyd edirik ki, layihənin məqsədi işğaldan azad olunmuş ərazilərə qayıtmış sakinlərin övladlarının mədəni həyata daha sıx inteqrasiya olunması, onlardan istedadlı gənclərin aşkar edilərək gələcəkdə respublika və beynəlxalq səviyyəli müsabiqələrdə iştirakına dəstək göstərilməsindən ibarətdir.
Bölmənin digər xəbərləri
