“Gənc Könüllülər” Hərəkatının fəaliyyətə başlamasının ikinci ildönümü qeyd olunur
Bakı, 7 dekabr, AZƏRTAC
Dekabrın 7-də Azərbaycan Respublikası Gənclər Fondunun təşəbbüsü ilə yaradılan “Gənc Könüllülər” Hərəkatı fəaliyyətə başlamasının ikinci ildönümünü qeyd edir.
Gənclər Fondundan AZƏRTAC-a bildiriblər ki, hərəkatın əsas məqsədi ölkənin rifahı üçün çalışan geniş könüllü şəbəkəsi formalaşdırmaq, eləcə də, gənclərin müəyyən istiqamətlər üzrə bilik və bacarıqlarının artırılmasına, fərdi inkişafına dəstək göstərməkdən ibarət olub.
Respublikanın 30-a yaxın şəhər və rayonunda bu günə qədər “Gənc Könüllülər” Hərəkatının 2000-dən çox könüllüsü fəaliyyət göstərib, regionlarda Gənclərin İnkişaf və Karyera mərkəzlərinin açılışında fəal iştirak ediblər.
Hərəkatın üzvləri gənclərin inkişafı sahəsində dövlət tərəfindən həyata keçirilən tədbirlərə dəstək məqsədilə iki il müddətində sosial, vətənpərvərlik və ekoloji istiqamətlərdə 100-dən çox layihənin, eyni zamanda, 900-ə yaxın tədbir və təlimlərin təşkilində yaxından iştirak ediblər.
Gənc könüllülər COVID-19 pandemiyası ilə əlaqədar ölkədə həyata keçirilən tədbirlərə də öz töhfələrini verməklə Azərbaycan Könüllü Təşkilatları İttifaqının həyata keçirdiyi “Bir-birimizi qoruyaq”, “Könüllü qonşu”, “Könüllü donor” kimi aksiyalarda iştirak edərək ölkənin bütün regionlarında yüzlərlə ailəyə maddi və mənəvi dəstək olub, eləcə də maarifləndirmə işlərində xüsusi fəallıq nümayiş etdiriblər.
Bölmənin digər xəbərləri
