Gənclər narkotik vasitələrin zərərləri barədə məlumatlandırılıblar
Bakı, 17 mart, AZƏRTAC
Yeni Azərbaycan Partiyası (YAP) Mərkəzi Aparatının, “Azərbaycan Televiziyası və Radio Verilişləri” Qapalı Səhmdar Cəmiyyətinin, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupunun 2023-cü il üçün birgə Tədbirlər Planına uyğun olaraq, Sabunçu rayon Gənclər Evində “Gələcəyimizi birlikdə düşünək” mövzusunda tədbir keçirilib.
Dövlət Komissiyasından AZƏRTAC-a bildirilib ki, əvvəlcə Ulu Öndər Heydər Əliyevin və şəhidlərimizin, eləcə də qardaş Türkiyədə təbii fəlakət nəticəsində həlak olanların əziz xatirəsi bir dəqiqəlik sükutla yad olunub.
YAP Sabunçu rayon təşkilatının sədri Araz Xudadanov bildirib ki, narkomaniya ilə mübarizə hər bir sağlam cəmiyyətin formalaşması üçün zəruri şərtlərdən biridir. Narkomaniya bəlası insan həyatında sağalmaz fəsadlar yaradır. Ona görə də gənclər bu bəladan uzaq olmalı, cəmiyyətin layiqli üzvü olmaq üçün təhsilə xüsusi önəm verməlidirlər.
YAP Mərkəzi Aparatının Gender siyasəti və gənclərlə iş şöbəsi müdirinin müavini Zəkiyyə Musayeva bildirib ki, narkomaniya ilə mübarizə və onun profilaktikası mühüm məsələ olmaqla yanaşı, sağlam gəncliyin yetişməsində ən vacib amillərdən biridir. Gənclərin zərərli vərdişlərdən uzaq olması üçün maarifləndirmə tədbirləri davamlı xarakter daşımalıdır. Ulu Öndər Heydər Əliyev Azərbaycan gəncliyini hər zaman güclü və sağlam görmək istəyirdi. Ümummilli Liderin bu istiqamətdə müəyyənləşdirdiyi siyasəti hazırda Prezident İlham Əliyev uğurla davam etdirir.
Digər çıxışlarda da narkomaniyanın fəsadlarından və ölkəmizdə bu sosial bəlaya qarşı aparılan uğurlu mübarizə tədbirlərindən danışılıb.
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən İşçi Qrupunun əməkdaşı Raqif Allahverdiyev maarifləndirmə işlərinin narkomaniyaya qarşı mübarizədə ən güclü vasitə olduğunu bildirib, bu sahədə həyata keçirilən mübarizə tədbirləri ilə bağlı statistik məlumatları təqdim edib. “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı”nda məhz maarifləndirmə məsələlərinə xüsusi yer verildiyi diqqətə çatdırılıb.
Sonda Azərbaycan Respublikası Gənclər Fondunun dəstəyi və “CAVAN” Gənclər Hərəkatının təşkilatçılığı ilə çəkilmiş “Qara talelər” sənədli filmi nümayiş etdirilib.
Bölmənin digər xəbərləri
