GƏNCLƏRƏ ÖZ BİZNESLƏRİNİ QURMAĞA DƏSTƏK VERİLƏCƏKDİR
Bakı, 18 avqust (AZƏRTAC). Gəncədə Gənclərin Məşğulluq Resurs Mərkəzi avqust ayında nəzərdə tutulan ilk 5 aylıq sənət kurslarını yekunlaşdırmışdır.
Gənclər və İdman Nazirliyindən bildirmişlər ki, ilk mərhələdə kurslara ümumilikdə 40 nəfər qəbul olunmuşdur. Sonrakı mərhələlərdə isə kursları 35 nəfər tələbə davam etdirmişdir. Yekun imtahan avqustun 3-də keçirilmişdir.
Kursları kosmetologiya üzrə 19 nəfər, tikiş üzrə 9 nəfər, komputer təmiri üzrə isə 7 nəfər bitirmişdir. Yekun qiymətlər hesablandıqdan sonra kursları müvəffəqiyyətlə bitirən tələbələrə sertifikat təqdim ediləcəkdir.
Tələbələr sənət kursları ilə bərabər biznes təlimlərində də iştirak etmiş, nəticədə isə həmin gənclər artıq öz biznes planlarını tərtib etməyə başlayıblar. Gənclər həmçinin "Gələcəyə Korpü" İctimai Birliyinin "Öz biznesinə başla" adı altında elan etdiyi texniki dəstək qrant müsabiqəsində iştirak edirlər. Müsabiqədən keçən gənclərə öz bizneslərini qurmaq üçün bütün texniki dəstək veriləcəkdir.
Gənclərin Məşğulluq Resurs Mərkəzi layihəsi çərçivəsində nəzərdə tutulan növbəti sənət kurslarının sentyabrda başlanması nəzərdə tutulmuşdur.
Qeyd edək ki, Gənclərin Məşğulluq Resurs Mərkəzi layihəsi Avropa Komissiyası və Gənclər və İdman Nazirliyinin maliyyə dəstəyi ilə həyata keçirilir.
Bölmənin digər xəbərləri
