Gənclərimiz təbiətin çirklənməsinə yox deyir
Bakı, 5 iyun (AZƏRTAC). Şahbuz Dövlət Təbiət Qoruğunda 5 iyun - Ətraf Mühitin Mühafizəsi Gününə həsr olunmuş “Gənclərimiz təbiətin çirklənməsinə yox deyir” mövzusunda tədbir keçirilmişdir.
AZƏRTAC xəbər verir ki, Naxçıvan Muxtar Respublikası (MR) Gənclər və İdman Nazirliyi ilə Yeni Azərbaycan Partiyası Naxçıvan Muxtar Respublikası Təşkilatının Heydər Əliyev adına Gənclər Birliyinin təşkil etdikləri tədbirdə muxtar respublikamızda fəaliyyət göstərən ali və orta ixtisas təhsili müəssisələrinin tələbələri iştirak etmişlər.
Naxçıvan (MR) gənclər və idman nazirinin müavini Məcid Seyidov 5 iyun - Ətraf Mühitin Mühafizəsi Günü ilə əlaqədar gənclərə ətraflı məlumat vermişdir. Sonra gənclər qoruqda insanların daha çox istirahət etdiyi ərazilərə atılmış tullantıları təmizləmişlər.
Ətraf mühitin mühafizəsi, gənclər arasında ekoloji maarifləndirmə işinin aparılması, asudə vaxtın səmərəli təşkil edilməsi, Naxçıvanın təbiətinin gənclərə tanıdılması və onlarda vətənpərvərlik tərbiyəsinin formalaşdırılması məqsədi ilə təşkil edilən tədbir mütəşəkkil şəkildə keçirilmişdir.
Hər bir tədbir iştirakçısı gördüyü işlə ətraf mühitin təmizliyinə öz töhfəsini verməyə çalışmışdır.
Sonda tədbir iştirakçıları Batabat Astrofizika Rəsədxanasında və Şahbuz Dövlət Təbiət Qoruğu ilə tanış olmuşlar. Tanışlıq zamanı muxtar respublikanın flora və faunası barədə gənclərə ətraflı məlumat verilmişdir.
Bölmənin digər xəbərləri
