“GLOBE International”in baş icraçı direktoru: Bakı İqlim Fəaliyyəti Həftəsi mühüm platformadır
London, 25 sentyabr, AZƏRTAC
Bakı İqlim Fəaliyyəti Həftəsi Azərbaycanda iqlim dəyişikliyi ilə mübarizədə bütün cəmiyyətin səfərbər edilməsində mühüm bir mərhələ oldu. Bu təşəbbüs COP29-a marağı, ictimai diqqəti və fəallığı artırdı. COP29-dan sonra isə onun rolu daha da önəm kəsb edir.
Bu sözləri AZƏRTAC-a müsahibəsində “GLOBE International”in baş icraçı direktoru Malini Mehra deyib. O, Bakı İqlim Fəaliyyəti Həftəsinin əhəmiyyətindən, COP29-dan sonrakı dövrdə iqlim diplomatiyasındakı inkişaflardan və gözləntilərdən danışıb.
Malini Mehra COP29-dan sonra Bakı İqlim Fəaliyyəti Həftəsinin daha da önəm kəsb etdiyini deyib: “Bu platforma institusional mirası davam etdirəcək və region üçün iqlim fəaliyyətinin hərəkətverici qüvvəsinə çevriləcək. Bakı İqlim Həftəsi artıq London, Rio, Banqkok kimi şəhərlərdə keçirilən iqlim həftələrinin qlobal ailəsinə qoşulub. Burada məqsəd, sadəcə, müzakirə aparmaq deyil, real fəaliyyət üçün platforma yaratmaqdır”.
O, Bakı İqlim Fəaliyyəti Həftəsindən gözləntilərin çox yüksək olduğunu bildirib. Qeyd edib ki, çoxlu təşəbbüslər mövcuddur və insanlar gördükləri işləri bölüşməkdə həvəslidirlər. Bakı İqlim Fəaliyyəti Həftəsi müsbət platformaya çevrilib: burada ən yaxşı təcrübələr paylaşılır, digərlərinə ilham verilir və əməkdaşlıq güclənir. Onun sözlərinə görə, yalnız birlikdə işləməklə, bir-birimizi ruhlandırmaqla və dəyişiklik üçün sürət toplamaqla uğur qazanmaq mümkündür. Malini Mehra qeyd edib ki, bu il əsas diqqət regionda yaşıl keçidin dəstəklənməsinə yönəlib və maraq da çox böyükdür.
COP29-un Bakıda keçirilməsindən təxminən bir il keçdiyini xatırladan Malini Mehra bildirib ki, son il iqlim diplomatiyası üçün asan olmayıb. Onun sözlərinə görə, bu çətinliklərə baxmayaraq, əksər ölkələr öhdəliklərini yenidən təsdiqləyib və yeni milli iqlim planları (NDC-lər) daha iddialı şəkildə təqdim olunub. Qlobal yaşıl iqtisadiyyat böyüməyə davam edir, bərpaolunan enerji sahəsinə yatırımlar isə hələ də güclü olaraq qalır.
O vurğulayıb ki, yaşıl keçid maneələrə baxmayaraq davam edir. Lakin iqlim təsirlərinin daha ağır və sürətli şəkildə özünü göstərməsi səbəbindən hazırda adaptasiya və dayanıqlılığa diqqət daha da artıb. Bu isə icmaların qorunması üçün çoxdan atılmalı olan addım idi.
Qeyd edək ki, Bakı İqlim Fəaliyyəti Həftəsi sentyabrın 29-dan oktyabrın 3-dək keçiriləcək. “GLOBE International” (Global Legislators Organisation for a Balanced Environment) qlobal miqyasda fəaliyyət göstərən təşkilatdır, əsas məqsədi qanunvericilər arasında iqlim dəyişikliyi, davamlı inkişaf və ekoloji idarəetmə sahəsində əməkdaşlığı gücləndirməkdir.
AZƏRTAC-ın xüsusi müxbiri
London
Bölmənin digər xəbərləri
