GÖMRÜKÇÜLƏR ÖTƏN İLƏ YEKUN VURMUŞLAR
Yanvarın 30-da Dövlət Gömrük Komitəsində 2002-ci ilin yekunlarına və qarşıda duran vəzifələrin müzakirəsinə həsr olunmuş kollegiya iclası keçirilmişdir.
İclasda qeyd olunmuşdur ki, ötən il Azərbaycanın gömrük orqanları 921,8 milyard manatdan çox gömrük və vergi rüsumu toplayaraq dövlət büdcəsinə köçürmüşlər. Bu, 2001-ci ildəkindən 12,3 faiz çoxdur.
Dövlət Gömrük Komitəsinin sədri, gömrük xidməti general-polkovniki Kəmaləddin Heydərov aparılan tarif siyasətindən danışaraq dedi ki, bu, daxili istehsalın qorunmasına, sahibkarlığın inkişafına yönəldilmişdir.
Kollegiya iclasında gömrük nəzarətinin təşkili, qaçaqmalçılıq və gömrük qaydalarının pozulması ilə mübarizə sahəsindəki işlərdən də söhbət getdi. Bildirildi ki, ötən il gömrükçülər qaçaqmal kimi 3 kiloqram 300 qramdan artıq narkotik maddə, 23,6 kiloqram qızıl-zinət əşyası, 411 kiloqram kürü aşkar etmişlər.
İclasda mövcud nöqsanlar və çatışmazlıqlardan da söhbət açıldı, eyni zamanda, xidmət vəzifəsinin yerinə yetirilməsində fərqlənən əməkdaşlara Dünya Gömrük Təşkilatının sertifikatları təqdim olundu.
Bölmənin digər xəbərləri
