REGİONLAR
Goranboyda əkin sahələrinin suvarma suyu ilə təminatı yaxşılaşdırılır VİDEO
Goranboy, 4 mart, AZƏRTAC
Goranboy Suvarma Sistemləri İdarəsi rayonun 66500 hektar əkin sahəsinin suvarılmasına xidmət edir. Ötən il əkin sahələrinin suvarılması tam olaraq həyata keçirilib. Bu sahələrin 3000 hektarı pambıq, 24500 hektarı taxıl, 15200 hektarı yem bitkiləri, 8500 hektarı həyətyanı, bostan, çoxillik bağ, günəbaxan, qarğıdalı, çuğundur və tütün plantasiyaları olub.
Meliorasiya və Su Təsərrüfatı Açıq Səhmdar Cəmiyyətinin mətbuat katibi Dilqəm Şərifov AZƏRTAC-ın bölgə müxbirinə bildirib ki, bu il də idarə payızlıq və yazlıq əkinlərin suvarılmasının mütəşəkkil aparılması üçün hazırlıq işlərini davam etdirir. Rayonda əkin aparılan sahələrin 46000 hektarı 958 ədəd subartezian quyusu və 16 ədəd nasos stansiyaları, 20500 hektarı isə təbii su mənbələri vasitəsilə suvarılır. Suvarma suyunun əkin sahələrinə çatdırılması üçün 1100 metr torpaq məcralı kanal beton üzlüyə alınıb, 3 ədəd hidrotexniki qurğuda və 3 ədəd nasos stansiyasında cari təmir işləri aparılıb. Bundan başqa, balansda olan 680 ədəd subartezian quyusunun nasosları təmir olunub, 50 ədədinin idarəetmə şitləri yeni çəpərə alınıb, 45 ədəd subartezian quyusunun isə elektrik avadanlıqlarında sazlama işləri aparılıb.
Rayonda uzun illərdir təsərrüfatla məşğul olan fermerlər bu il əkdikləri məhsulun sahəsini genişləndirmək qərarına gəliblər. Bu da suvarma suyunun daha asan və itkisiz əldə olunması ilə əlaqəlidir.
Goranboy Suvarma Sistemləri İdarəsi su itkisinin qarşısının alınması və suvarma suyunun fermerlərə daha asan çatdırılması üçün torpaq məcralı kanallarda lildən təmizləmə işlərini də davam etdirir. Bu günə qədər idarənin texnikaları vasitəsilə 541 min kubmetr kanal və arxlarda lildən təmizləmə işləri görülüb, selə qarşı mübarizə tədbirləri çərçivəsində isə 77000 kubmetr çay məcraları təmizlənib.
Qeyd edək ki, idarə tərəfindən məhsuldarlığını tamamilə itirmiş Xınalı, Goranlı, Fəxralı, Qaramusalı, Borsunlu Səfikürd kəndlərində 1, Veyisli kəndində isə 2 ədəd olmaqla, ümumilikdə, 8 ədəd subartezian quyusunun iş rejimi bərpa olunub.