Göyçayın iki kəndində modul tipli sutəmizləyici qurğu inşa edilir
Göyçay, 27 fevral (AZƏRTAC). Göyçay rayonunun kəndlərində əhalinin içməli suya olan tələbatının ödənilməsi üçün mühüm işlər görülür. Rayon icra hakimiyyətindən AZƏRTAC-a bildirmişlər ki, artezian quyusunun qazılması üçün yeraltı içməli su mənbəyi olmayan 18 kənddə modul tipli sutəmizləyici qurğuların quraşdırılması nəzərdə tutulmuşdur. Ekologiya və Təbii Sərvətlər Nazirliyinin sifarişi ilə əvvəlcə rayonun ucqar yaşayış məntəqələrindən olan Bəydövül və Çaxırlı kəndlərində qurğuların tikintisinə başlanılmış, küçələrə daşıyıcı su xətləri çəkilmiş, bulaqlar inşa edilmişdir. Yaxın vaxtlarda istifadəyə veriləcək qurğular 5 minə yaxın əhalini ekoloji cəhətdən təmiz içməli su ilə təmin edəcəkdir.
Regionların sosial-iqtisadi inkişafı Dövlət Proqramına uyğun olaraq rayonun Mirzəhüseynli, Alpoud, Bığır, Türkmən, Şıxəmir, Kürdşaban, Veysəlli, Qaraman, Müskürlü, Mırtı, Ərəbcəbirli, Qəbələ-Müskürlü, Şıxbəy, Alıkənd, Məlikkənd və Cırqurd kəndlərində modul tipli sutəmizləyici qurğunun quraşdırılması nəzərdə tutulur. Bunun üçün artıq 10 kənddə torpaq sahəsi ayrılmışdır. Bütün işlərin 2013-cü ilədək başa çatdırılması nəzərdə tutulur.
Bölmənin digər xəbərləri
