GUAM-a üzv dövlətlərin təhsil diplomlarının beynəlxalq səviyyədə tanınması məsələləri müzakirə edilib
Kiyev, 31 oktyabr, AZƏRTAC
GUAM-a üzv olan ölkələr arasında təhsil sahəsində əməkdaşlığın gücləndirilməsi üçün səylər artırılacaq.
GUAM-ın Katibliyindən AZƏRTAC-a bildiriblər ki, bu barədə Gürcüstanın sədrliyi ilə Elm və Təhsil üzrə İşçi Qrupun videokonfrans vasitəsilə üçüncü iclasında müzakirə aparılıb.
İştirakçılar təhsil sistemlərinin fəaliyyətində, o cümlədən hərbi vəziyyət şəraitində əsas dəyişikliklər barədə məlumat mübadiləsi aparıb, GUAM-a üzv dövlətlərin təhsil sistemlərinin Avropa və qlobal standartlara uyğunlaşdırılmasını, GUAM-a üzv dövlətlərin təhsil diplomlarının, sertifikatlarının beynəlxalq səviyyədə tanınması məsələlərini müzakirə ediblər.
Qrup üzvləri GUAM-a üzv dövlətlər arasında ümumi orta, peşə, orta ixtisas, ali və ali təhsildən sonrakı təhsil sahələrində əməkdaşlığın daha da inkişaf etdirilməsinin vacibliyini vurğulayıblar və GUAM-a üzv dövlətlərin təhsil nazirlikləri arasında təhsil sahəsində əməkdaşlıq haqqında Sazişin həyata keçirilməsi üçün koordinasiya və əməkdaşlığı daha da gücləndirməyə hazır olduqlarını bildiriblər.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
