Gücünü Heydər Əliyev ideyalarından alan Yeni Azərbaycan Partiyası yeni hədəflərə doğru inamla irəliləyir
Bakı, 12 mart, AZƏRTAC
Yeni Azərbaycan Partiyasının VII qurultayı, partiyanın Sədri, Prezident İlham Əliyevin qurultayda proqram xarakterli çıxışı bugünkü Azərbaycanın ictimai-siyasi həyatının, xalq-iqtidar birliyinin dolğun mənzərəsinin ifadəsi olmaqla, cəmiyyətdə geniş əks-səda doğurub. AZƏRTAC YAP-ın üzvü, Göytəpə 1 saylı tam orta məktəbin tədris hissə müdiri, Əməkdar müəllim Elmira Abbasovanın bununla vağlı qeydlərini təqdim edir.
Yeni Azərbaycan Partiyası ötən əsrin 1980-ci illərinin sonu - 1990-cı illərinin əvvəllərində ölkəmizdə cərəyan edən mürəkkəb siyasi situasiyanın daxili məntiqindən, zamanın tələbindən irəli gələrək Azərbaycan xalqının arzu və istəklərinin ifadəsi kimi yaranıb.
Xalqın ümummilli lider Heydər Əliyevə olan inamı siyasi səhnədə çox tez bir zamanda parlayan Yeni Azərbaycan Partiyasının tarixi məsuliyyəti öz üzərinə götürməsinə imkan verdi. Ulu Öndərin sədrliyi ilə partiyanın Naxçıvanda təsis konfransının keçirməsi müasir Azərbaycan dövlətçiliyi tarixində dönüş nöqtəsi oldu.
YAP-ın yaranması, ümummilli lider Heydər Əliyevin bu partiyaya sədr seçilməsi respublikada gərgin, getdikcə daha təhlükəli xarakter alan ictimai-siyasi vəziyyətindən irəli gələn tarixi zərurət idi. Ozamankı hakimiyyət dairələrinin Yeni Azərbaycan Partiyasının yaranmasına maneçilik törətmək cəhdləri, aramsız təzyiqlər bu yola qədəm qoyan insanları özlərinin ali məqsədlərindən döndərə bilmədi. Çünki sağlam düşüncəli bütün vətənpərvər insanlar Heydər Əliyevin rəhbəri olduğu partiyanın xilaskar missiya üçün yarandığını anlayır və Yeni Azərbaycan Partiyasına dəstəyi əsirgəmirdilər. Qeyd edək ki, o vaxt AXC-Müsavat cütlüyü partiyanın təsis konfransının Bakıda keçirilməsinə imkan verməmişdi. Lakin müxtəlif bölgələrdən 500-dən çox nümayəndə Naxçıvana gələrək konfransda iştirak etdi.
Ümummilli Liderimizin nüfuzu, Azərbaycan xalqının ona böyük inamı Yeni Azərbaycan Partiyasının sürətlə təşkilatlanmasına, ölkənin bütün regionlarında özəklərini yaratmasına və 1993-cü ildə hakimiyyətə gəlməsinə şərait yaratdı. Çünki xalq ölkəni bürüyən böhrandan çıxış yolunu məhz Heydər Əliyevin hakimiyyətə qayıdışında görürdü.
Yeni Azərbaycan Partiyası yarandığı vaxtdan cəmi 7 ay sonra hakim partiyaya çevrildi və bunun dünya siyasi məkanında bənzəri yoxdur. YAP ötən müddətdə ümummilli lider Heydər Əliyev tərəfindən müəyyənləşdirilən bütün hədəflərə nail olub. Azərbaycanın müstəqilliyinin qorunub möhkəmləndirilməsində, demokratik, hüquqi, dünyəvi dövlət qurulmasında, ölkəmizdə möhkəm ictimai-siyasi sabitlik, milli həmrəylik, güclü və sosialyönümlü iqtisadiyyat yaradılmasında həlledici rol oynayıb. Nəhayət, 44 günlük Vətən müharibəsində qazanılan möhtəşəm qələbə nəticəsində torpaqlarımız 30 il davam edən işğaldan azad olunub, ərazi bütövlümüz bərpa edilib.
Yeni Azərbaycan Partiyası bu gün də Azərbaycanın aparıcı siyasi qüvvəsi, Cənubi Qafqazın ən böyük partiyasıdır. Ulu öndər Heydər Əliyevin siyasi varisi olaraq İlham Əliyev Yeni Azərbaycan Partiyasının gələcək fəaliyyətini daha geniş müstəvilərə daşımaq məqsədini uğurla həyata keçirir. Prezident İlham Əliyevin YAP-ın Sədri seçilməsindən sonra istər kəmiyyət, istərsə də keyfiyyət baxımından partiyada əhəmiyyətli dəyişikliklər baş verib. Faktlara diqqət yetirdikdə Heydər Əliyev ideyalarına söykənən partiyamızın ilbəil gücləndiyinin bir daha şahidi oluruq. Belə ki, 2001-ci ildə partiya üzvlərinin sayı 230 min nəfər idisə, bu gün YAP öz sıralarında 700 mindən çox insanı birləşdirir.
Qurultayda çıxışı zamanı Prezident İlham Əliyev Yeni Azərbaycan Partiyasının ölkəmizin taleyində oynadığı əvəzsiz rolu belə səciyyələndirdi: “Faktiki olaraq 1992-ci ilin noyabr ayı gənc ölkəmizin həyatında yeni bir mərhələyə yol açdı. Ondan sonra heç bir il keçməmiş - 1993-cü ilin oktyabr ayında Heydər Əliyev xalqın mütləq əksəriyyətinin dəstəyi ilə Prezident vəzifəsinə seçildi və ölkəmizin böhrandan çıxma prosesi artıq başladı. Biz bu tarixi yaxşı bilməliyik. O tarixi yaşamayanlar isə bunu öyrənməlidirlər. Mən demişəm, bizim dərsliklərdə bu tarixlə bağlı geniş məlumat verilməlidir. O tarixin canlı şahidləri öz xatirələrini bölüşməlidirlər ki, bu tarix əbədi yaşasın”.
Partiya Sədrinin proqram xarakterli nitqində qarşıya qoyduğu bu ümdə vəzifənin yerinə yetirilməsində təbii ki, biz pedaqoqların üzərinə daha çox məsuliyyət düşür.
Qurultayda partiyanın Sədri, Prezident İlham Əliyevin proqram xarakterli nitqi, 6 siyasi partiyanın YAP-a qoşulması, birinci müavin postunun təsis olunması, İdarə Heyətinin yenilənməsi və günün tələbindən irəli gələn digər təşkilati dəyişikliklər, eləcə də köhnə və yeni nəsil siyasətçilər arasında balansın tənzimlənməsi qüvvələri qarşıda duran yeni hədəflərin reallaşmasına səfərbər etmək baxımından böyük əhəmiyyətə malikdir.
Bu gün qürur duyduğumuz ən mühüm reallıq dinamik inkişaf edən qüdrətli Azərbaycandır. Gücünü ulu öndər Heydər Əliyev ideyalarından alan Yeni Azərbaycan Partiyası yeni hədəflərə doğru inamla irəliləyir. Onun gücü həm də milli maraqları, xalqın mənafeyini daim uca tutmasında, sıralarında birləşən 700 mindən çox partiya üzvündədir. Bu, sadəcə, statistika deyil, partiyanın gücünün və qüdrətinin əyani göstəricisidir.
Bölmənin digər xəbərləri
