Gürcü ekspertlər: Avropa İttifaqı Gürcüstanı cəzalandırmaq üçün onu Ermənistanla əvəzləmək istəyir
Tbilisi, 16 iyul, AZƏRTAC
Son vaxtlar Avropa İttifaqının (Aİ) və ABŞ-ın Gürcüstana qarşı mövqeyinin dəyişməsi qonşu ölkədə birmənalı qarşılanmayıb.
AZƏRTAC xəbər verir ki, siyasi analitiklər Aİ-nin və ABŞ-ın bu siyasətini Gürcüstanı cəzalandırmaq cəhdi kimi qiymətləndirirlər.
Avropa Araşdırmaları Mərkəzinin direktoru Kaxa Qoqolaşvili deyir ki, artıq Avropa İttifaqı Gürcüstana qarşı siyasi oyunlara qarışıb. Bu oyunun bir hissəsi ondan ibarətdir ki, Avropa İttifaqı artıq regionda diqqətini Ermənistana yönəldib və görünür, İrəvanı Gürcüstanın əvəzedicisi hesab edir. Ümumiyyətlə, oxşar tendensiyanı ABŞ tərəfdən də müşahidə etmək olar.
Onun sözlərinə görə, Avropa İttifaqı və ABŞ-ın Gürcüstanı nə dərəcədə əvəzləyəcəkləri başqa məsələdir. İndiyədək Qafqazda Qərbin yeganə istinad nöqtəsi Gürcüstan idi. İndi isə Ermənistanı irəli çəkməklə Gürcüstanı cəzalandırmağa çalışırlar.
Siyasətçi deyir ki, Qərb Gürcüstan üçün daha bir sürpriz hazırlayıb. Avropa İttifaqının Gürcüstana verməli olduğu vəsait regionun digər ölkələrinə paylanacaq. Avropa İttifaqının sanksiyaları artıq qüvvədədir, çünki onların bütün layihələrinin maliyyələşdirilməsi dayandırılıb.
K.Qoqolaşvili hesab edir ki, Aİ hələlik vizasız gediş-gəliş məsələsində bir qədər gözləyəcək. Yəni, oktyabr ayında keçiriləcək parlament seçkilərinə qədər bu məsələyə toxunulmayacaq.
“Xalqın Gücü” partiyasının üzvü, analitik Davit Kartvelişvili də hesab edir ki, Qərb Gürcüstanı əvəz etməyə çalışır.
“”Əlbəttə, mən Avropa İttifaqının Qafqaz regionunda Gürcüstanı əvəz etmək istəyini görürəm, lakin bu, Aİ-nin özünün oyunu deyil. Avropa İttifaqı bu gün qlobal müharibə tərəfinin girovudur. Onun hazırkı mərhələdə ən aqressiv nümayəndəsi Aİ-nin həm daxili, həm də xarici siyasətini idarə edən hazırkı ABŞ administrasiyasıdır. Ona görə də Ermənistanda Avropa İttifaqının xətti ilə gördüyümüz hər şey, əslində, ABŞ-ın indiki administrasiyasının xəttidir”, – deyə D.Kartvelişvili vurğulayıb.
Analitik bu günlərdə USAID-in rəhbəri Samanta Pauerin Ermənistanda üçgünlük səfərdə olmasını da təsadüf hesab etmir.
O deyib: “Bu təşkilat Azərbaycanda “non-qrata” elan edilir, çünki Azərbaycanda “maydan ssenarisinin hazırlanmasına və hökuməti devirmək cəhdi”nə görə ifşa edilib. USAID-in Gürcüstandakı təşkilatının mənfur niyyəti də ifşa olunub. Bu təşkilatın maliyyəsi ilə Gürcüstana inqilab, çevriliş təşkil etmək üçün fəallar yetişdirən məşhur “Maydan siyasi texnoloqları” gətirildi.
“USAID və digər beynəlxalq təşkilatlar üçün hələ də əlçatan olan və antidövlət hərəkatlarını maliyyələşdirən yeganə ölkə Ermənistandır ki, burada da xanım Samanta Pauer iştirak edir və ağırlıq mərkəzini Tbilisidən İrəvana köçürməyə çalışır”, - deyə Davit Kartvelişvili diqqətə çatdırıb.
Siyasi ekspert Zaal Anjaparidze hesab edir ki, Gürcüstan üçün nəzərdə tutulan məbləğin regionun digər ölkələrinə paylana biləcəyi barədə məlumat daha çox əsaslandırma tələb edir.
Avropa İttifaqının Gürcüstana vizasız gediş-gəlişi dayandıra biləcəyi ilə bağlı yayılan məlumatlara gəlincə, analitik hesab edir ki, belə bir iddianın yeganə məqsədi seçkilərdən əvvəl “Gürcü arzusu-demokratik Gürcüstan” partiyasının mövqelərini zəiflətməkdir. Avropa İttifaqı vizasız gediş-gəlişin dayandırılmasının buna töhfə verəcəyini düşünsə, bu qərarı qəbul edəcək.
Zaal Anjaparidzenin sözlərinə görə, bu gün artıq aydındır ki, Avropa İttifaqı və ABŞ “Gürcü arzusu”nun bu seçkilərdə qalib gəlməsinin, daha bir müddət hakimiyyətdə qalmasının qarşısını almaq üçün hər şeyi edir.
Analitik bildirir ki, bu gün, əslində, regionun lideri Gürcüstan deyil, Azərbaycandır. Azərbaycan öz ərazi bütövlüyünü bərpa edib. Bundan başqa, Rusiyaya qarşı tətbiq edilən sanksiyalara görə enerji marşrutlarının bir hissəsi Azərbaycan və Gürcüstan vasitəsilə Avropaya gedir. Bu məsələdə Azərbaycanın da rolu artıb. Bununla belə, Gürcüstanın da rolu azalmır, çünki Gürcüstan Asiya və Azərbaycandan enerji marşrutlarının keçdiyi tranzit qovşaqdır. Avropa İttifaqının həyata keçirməyə başladığı layihələr, məsələn, elektrik kabelləri Gürcüstandan keçməlidir. Beləliklə, Gürcüstan prosesdə mühüm yer tutur.
“Avropa İttifaqı və ABŞ-ın Gürcüstan hakimiyyətini bəyənməməsi ayrı məsələdir. Lakin Gürcüstanın geostrateji mövqeyini heç nə əvəz edə bilməz, biz olduğumuz yerdəyik və əhəmiyyətimiz tanınır”, - deyə, Zaal Anjaparidze vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
