Gürcüstan azərbaycanlıları Fransa parlamentinin rüsvayçı qanununu pisləyirlər
Tbilisi, 27 dekabr (AZƏRTAC). Gürcüstanın Reinteqrasiya Məsələləri üzrə Dövlət Nazirliyinin məsul əməkdaşı Savalan Mirzəyev Fransa parlamenti aşağı palatasının qondarma “erməni soyqırımı”nı inkar edənlərin cəzalandırılması ilə bağlı qəbul etdiyi qanuna münasibət bildirmişdir. S.Mirzəyev demişdir ki, Gürcüstan azərbaycanlıları Fransanın aşağı qanunverici orqanı olan Milli Assambleyanın qondarma “erməni soyqırımı”nı inkar edənlərin cəzalandırılması ilə bağlı qəbul etdiyi rüsvayçı qanunu qətiyyətlə pisləyirlər. O bildirmişdir ki, belə bir qanunun qəbul edilməsi Gürcüstanın hakimiyyət nümayəndələri arasında təəccüb və təəssüf hissi doğurmuşdur.
Gürcüstan ictimaiyyətinin fikrincə, demokratiyadan dəm vuran Fransa bir əsr əvvəl, özü də belə bir hadisənin olub-olmamasını araşdırmadan ədalətsiz qanun qəbul etməkdənsə, öz əcdadlarının törətdiyi hadisələrə, axıtdığı günahsız insan qanına münasibət bildirib siyasi qiymət versəydi, yaxud da Qarabağ münaqişəsinin tənzimlənməsi üzrə ATƏT-in Minsk qrupu həmsədrlərindən biri olduğu üçün ermənilərin Azərbaycanda törətdikləri separatizm və terror hadisələrinə, dəhşətli Xocalı soyqırımına münasibət bildirsəydi, daha yaxşı olardı.
Savalan Mirzəyev vurğulamışdır ki, Türkiyə kimi tolerant bir dövlətə qarşı belə haqsız ittiham Gürcüstan azərbaycanlılarını da çox qəzəbləndirmişdir. Biz həmin qanunu pisləyirik.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
