Gürcüstanda 20 Yanvar şəhidlərinin xatirəsi silsilə tədbirlərlə anılıb
Tbilisi, 24 yanvar, AZƏRTAC
Gürcüstanda 20 Yanvar faciəsinin 36-cı ildönümü ilə əlaqədar Azərbaycan səfirliyinin hazırladığı tədbirlər planı çərçivəsində anım tədbirləri keçirilib.
AZƏRTAC xəbər verir ki, Azərbaycanın Gürcüstandakı səfiri Faiq Quliyev və səfirlik əməkdaşları şəhid ailələrini ziyarət edib, onların qayğıları ilə maraqlanıblar.
Əvvəlcə Bolnisi rayonunun Faxralı kənd qəbiristanlığında şəhid İlqar Əhmədovun məzarı ziyarət olunub, şəhidlərin ruhuna dualar oxunub.
Faxralı 1 və 2 nömrəli İctimai məktəblərinin müəllim və şagirdləri Qanlı Yanvar faciəsi ilə bağlı fikirlərini bölüşüb, şəhidlərə həsr olunmuş şeirlər söyləyiblər.
Bildirilib ki, Faxralı ictimaiyyəti İlqar Əhmədovun timsalında bütün şəhidlərimizlə fəxr edir.
Kənd sakinləri adından çıxış edən müəllim Fatma Əliyeva deyib ki, Qanlı Yanvardan 36 il keçsə də, Azərbaycan müstəqillik uğrunda canlarından keçən övladlarını unutmur. Nə qədər ki, qədirbilən Azərbaycan xalqı var, şəhidlərin əziz xatirəsi daim yaşayacaq.
Səfir Faiq Quliyev deyib ki, xalqımız şəhidlərin xatirəsini hər zaman milli iftixar hissi ilə anır. Dövlətimiz hər zaman onların ailələrinə diqqət və qayğı göstərir. 20 Yanvar faciəsi zamanı Gürcüstandan olan 6 soydaşımız şəhid olub. Onlardan biri İlqar Əhmədov Faxralıda, digərləri isə Azərbaycanda dəfn olunublar.
Diplomat 20 Yanvar faciəsinin tariximizin qəhrəmanlıq səhifəsi olduğunu vurğulayıb, şəhidin yaxınlarına səbir diləyib.
Sonra tədbir iştirakçıları şəhid İlqar Əhmədovun kənddəki ata evinə gələrək anası Nigar xanımla görüşüb, onun qayğıları ilə maraqlanıblar. Nigar ana göstərilən diqqət və qayğıya görə, minnətdarlıq edib.
Sonra səfir və ziyalılar Bolnisi rayonu Kəpənəkçi kəndindən olan 20 Yanvar şəhidi Tengiz Turabovun ailəsini ziyarət ediblər.
Səfir Faiq Quliyev deyib ki, Gürcüstanda yaşayan soydaşlarımızın ürəyi hər zaman mənəvi vətənləri olan Azərbaycanla bir döyünüb: “Biz bunu 20 Yanvar hadisələri, eləcə də torpaqlarımızın işğaldan azad olunması istiqamətində gedən döyüşlərdə görmüşük. Azərbaycanın müstəqilliyi və ərazi bütövlüyü uğrunda həlak olan qəhrəman şəhidlərimiz bizim qürur mənbəyimizdir. Onların əziz xatirəsi daim qəlbimizdə yaşayacaq”.
Sonra Gürcüstan parlamentinin sabiq deputatı Ramiz Bəkirov çıxış edərək kənd ağsaqqalları və şəhidin ailə üzvləri adından Azərbaycan dövlətinə və səfirə minnətdarlıq edib.
Şəhidin qardaşı Yaşar Turabov və başqaları çıxış ediblər. Bildirilib ki, Gürcüstanda yaşayan hər bir azərbaycanlı mənəvi Vətən Azərbaycan uğrunda canından keçməyə hazırdır.
Qeyd edək ki, elə həmin gün 20 Yanvar faciəsinin 36-cı ildönümü ilə əlaqədar Azərbaycanın Gürcüstandakı səfirliyinin əməkdaşları və ictimaiyyət nümayəndələri paytaxt Tbilisinin Poniçala (Soğanlıq) qəsəbəsində 20 Yanvar və 9 Aprel şəhidlərinin xatirəsinə ucaldılmış abidəni ziyarət ediblər.
Səfirlik əməkdaşları yerli sakinlərlə görüşərək onların qayğıları ilə maraqlanıblar.
Daha sonra Qardabani bələdiyyəsinin Ağtəhlə kəndindən olan 20 Yanvar şəhidi Rəşid İsmayılovun ailəsi ziyarət olunub. Görüş zamanı Rəşid İsmayılovun qəhrəmanlığından danışılıb, xatirəsi yad edilib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
