GÜRCÜSTANDA YAŞAYAN AZƏRBAYCANLI GƏNCLƏR YAXIN DOĞU UNİVERSİTETİNDƏ TƏHSİL ALACAQLAR
Bakı, 11 avqust (AZƏRTAC). Diasporla İş üzrə Dövlət Komitəsindən (DİDK) AZƏRTAC-a bildirmişlər ki, Marneulidə Azərbaycanlıların Mədəniyyət Mərkəzində (AMM) Şimali Kiprin Yaxın Doğu Universitetində təhsil almaq istəyən gənclərlə görüş keçirilmişdir.
Görüşdə DİDK-nın şöbə müdiri Füzuli Nəcəfov, Yaxın Doğu Universitetinin prorektoru, professor Fəxrəddin Məmmədov, AMM-in sədri Fazil Həsənov, Gürcüstan Azərbaycanlıları Konqresinin sədri Əli Babayev və jurnalistlər iştirak etmişlər. Füzuli Nəcəfov Yaxın Doğu Universitetində təhsil almaq istəyən tələbələrə Azərbaycan dövlətinin qayğısından söhbət açmışdır.
Universitetə bütün fənlərdən yüksək nəticələr əldə etmiş gənclər qəbul ediləcəklər. Sentyabrın 8-10-da gənclər Şimali Kiprə yola düşəcəklər.
Yaxın Doğu Universitetinin prorektoru, professor Fəxrəddin Məmmədov bildirmişdir ki, Gürcüstanda yaşayan azərbaycanlıların iqtisadi vəziyyəti nəzərə alınaraq onlara ödənişsiz oxumaq imkanı veriləcəkdir. Tələbələr yataqxana ilə də təmin olunacaqlar. Tələbələrə bir ildə 100 min avro vəsait sərf ediləcəkdir.
F.Məmmədov onu da deyib ki, onlar gələn ildən gürcü gənclərinə də yer ayrılacaqlar.
Qeyd edək ki, Azərbaycan Respublikası Diasporla İş üzrə Dövlət Komitəsinin Yaxın Doğu Universiteti ilə əldə etdiyi anlaşmaya əsasən Gürcüstanda yaşayan azərbaycanlı gənclər üçün həmin təhsil ocağında müxtəlif ixtisaslar üzrə 20 yer ayrılmışdır.
Bölmənin digər xəbərləri
