GÜRCÜSTANIN KVEMO KARTLİ-BORÇALI BÖLGƏSİNDƏ XOCALI FACİƏSİNƏ HƏSR OLUNMUŞ TƏDBİRLƏR KEÇİRİLMİŞDİR
Tbilisi, 23 fevral (AZƏRTAC). Fevralın 23-də Azərbaycanın Gürcüstandakı səfirliyi və Kvemo Kartli-Borçalı bölgəsi quberniyasının dəstəyi ilə ölkənin azərbaycanlılar yaşayan rayonlarında Xocalı faciəsinin 18-ci ildönümü ilə bağlı tədbirlər keçirilmişdir.
Tədbirlərdə Xocalı soyqırımı qurbanlarının xatirəsi bir dəqiqəlik sükutla yad olunmuş, şəhidlərin ruhuna dualar oxunmuşdur.
Azərbaycanın Gürcüstandakı səfiri Namiq Əliyev Dmanisi rayon mərkəzindəki Heydər Əliyev Fondunun kompyuter təhsil mərkəzində keçirilən Xocalı faciəsinə həsr olunmuş tədbirin iştirakçılarına soyqırımın yaranması səbəbləri və nəticələri barədə ətraflı məlumat vermişdir. Səfir İslam Konfransı Təşkilatı Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə başlanmış “Xocalıya ədalət” kampaniyasının hər yerdə olduğu kimi, Gürcüstanda da çoxlu tərəfdarlar tapacağına əminliyini bildirmiş və bu hərəkatın məqsədinin beynəlxalq təşkilatlardan Xocalı soyqırımına siyasi və hüquqi qiymət vermələrini tələb etmək olduğunu demişdir. N.Əliyev qeyd etmişdir ki, həmin kampaniyanı dəstəkləyənlər üçün Gürcüstanda da xüsusi veb-sayt açılmışdır.
Sonra tədbir iştirakçıları beynəlxalq təşkilatlara Xocalı soyqırımına siyasi və hüquqi qiymət verilməsi ilə əlaqədar ünvanlanmış müraciətə imza atmışlar. Tədbirin100 nəfərədək iştirakçısı öz imzası ilə Leyla xanım Əliyevanın təşəbbüsü ilə başlanmış kampaniyaya tərəfdar olduğunu təsdiq etmişdir. Onların arasında xeyli gürcü də vardır.
Həmin gün faciə qurbanlarının xatirəsi azərbaycanlıların Marneuli şəhərindəki mədəniyyət mərkəzində də anılmışdır. Mərkəzin direktoru Fazil Həsənov Xocalı soyqırımını yaxın tariximizin ən dəhşətli faciəsi adlandırmış, Leyla xanım Əliyevanın təşəbbüsü ilə başlanmış “Xocalıya ədalət” kampaniyasına tərəfdar olanların sayının getdikcə artdığını bildirmiş və bunun beynəlxalq təşkilatların diqqətinə çatdırılıb faciəyə obyektiv qiymət verilməsi ilə nəticələnəcəyinə əminlini ifadə etmişdir.
Tədbirdə ulu öndər Heydər Əliyevin Xocalı soyqırımının 10 illiyi ilə əlaqədar Azərbaycan xalqına müraciətindən aşağıdakı sitat səslənmişdir: “Bu amansız və qəddar soyqırımı aktı insanlıq tarixinə ən qorxulu kütləvi terror aktlarından biri kimi daxil oldu. Bütövlükdə Azərbaycan xalqına qarşı yönəlmiş Xocalı soyqırımı öz ağlasığmaz qəddarlığı və qeyri-insani cəza üsulları ilə bəşər tarixində bir vəhşilik aktıdır. Bu soyqırımı, eyni zamanda, bütün bəşəriyyətə qarşı tarixi bir cinayətdir”.
Mərasimdə Azərbaycanın Gürcüstandakı səfiri Namiq Əliyev, Gürcüstan parlamentinin deputatı Azər Süleymanov, Kvemo Kartli-Borçalı bölgəsi qubernatorunun müavini Koba Kobiaşvili, Azərbaycan və gürcü ictimaiyyətinin nümayəndələri iştirak etmişlər.
Qardabani rayon mərkəzində keçirilmiş tədbiri Gürcüstan Gənclərə Yardım və Maarifləndirmə Dərnəyinin sədri Musa Hacıyev açaraq Xocalı faciəsi barədə ətraflı məlumat vermişdir. İslam Konfransı Təşkilatı Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə başlanmış “Xocalıya ədalət” kampaniyasına diqqəti cəlb edən natiq qardabanililərin təşəbbüsə böyük fəallıqla qoşulduqlarını demişdir.
Azərbaycanın Gürcüstandakı səfirliyinin məsul əməkdaşı Fəxri Hacıyev erməni qəsbkarlarının fitnəkarlığı sayəsində törədilmiş Xocalı faciəsinin heç vaxt qan yaddaşımızdan silinməyəcəyini bildirmişdir. F.Hacıyev qeyd etmişdir ki, Azərbaycan diplomatiyası beynəlxalq təşkilatları həqiqəti etiraf etməyə məcbur edəcək, ölkəmizin ərazi bütövlüyü bərpa olunacaqdır.
Türkiyə Maarifləndirmə Təşkilatı Gürcüstan bölməsinin rəhbəri Emin Şəkərçi, Qardabani rayonundakı Kosalı kənd məktəbinin direktoru Sahib Mustafayev və başqaları Xocalı soyqırımına beynəlxalq səviyyədə siyasi və hüquqi qiymət veriləcəyinə əmin olduqlarını bildirmişlər.
Tədbir iştirakçıları Heydər Əliyev Fondunun göndərdiyi Xocalıya həsr olunmuş filmə tamaşa etmiş, Fondun dəstəyi ilə müxtəlif dillərdə işıq üzü görmüş kitablarla tanış olmuş, fotosərgiyə baxmışlar.
Gürcüstan paytaxtında isə Xocalı soyqırımına həsr olunmuş tədbirlər fevralın 24-də ulu öndər Heydər Əliyevin Tbilisidəki büstü önünə əklillər qoyulması ilə başlanacaqdır. Azərbaycanlıların Tbilisidəki “Varlıq” mədəniyyət mərkəzində “Xocalıya ədalət” kampaniyasına dəstək verənlərin imzalarını toplamaq üçün təşkil olunmuş xüsusi veb-saytın təqdimat mərasimi keçiriləcək, çıxışlardan sonra Azərbaycan və gürcü bəstəkarlarının Xocalı soyqırımı qurbanlarının xatirəsinə həsr olunmuş əsərləri səsləndiriləcəkdir.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
