Bakı, 27 may, Samirə Allahverdiyeva, AZƏRTAC 

Azərbaycan Respublikası Milli Məclisinin əmək və sosial siyasət komitəsinin sədri Hadi Rəcəbli AZƏRTAC-a məxsusi müsahibəsində dövlətin məcburi köçkünlərə diqqət və qayğısından, Xalq Cümhuriyyətinin tariximizdəki yeri və rolundan, həmçinin xəyanətkar qüvvələrin ölkəmizə qarşı məkrli planlarından danışır.

X X X

Hadi müəllim, mayın 24-də dövlətimizin başçısının iştirakı ilə məcburi köçkünlər üçün ən müasir standartlara cavab verən növbəti şəhərcik - “Qobu Park” yaşayış kompleksi istifadəyə verildi. Bu, Azərbaycan Xalq Cümhuriyyətinin 100 illik yubileyi ərəfəsində dövlətimizin məcburi köçkünlərə töhfəsi, onların sosial-məişət şəraitinin yaxşılaşdırılması istiqamətində görülən işlərin məntiqi nəticəsidir. Siz bu barədə nə deyə bilərsiniz?

- Bir sualda iki vacib məsələyə toxundunuz - məcburi köçkünlərə dövlət qayğısı və Azərbaycan Xalq Cümhuriyyətinin 100 illiyi. Mən də suala bu ardıcıllıqla cavab verəcəyəm.

Əvvəla onu deyim ki, “Qobu Park” yaşayış kompleksi ölkə üzrə məcburi köçkünlər üçün salınan sayca 98-ci şəhərcikdir. Qeyd edim ki, 2007-ci ildə ölkədəki 12 çadır düşərgəsinin ləğv edilməsi ilə başlanan proses nəticəsində qaçqın və məcburi köçkünlər üçün indiyədək 3,2 milyon kvadratmetr yaşayış sahəsi olan müasir qəsəbələr və çoxmərtəbəli binalardan ibarət yaşayış kompleksləri salınıb. İndiyədək 52 min 500 ailənin və ya 265 mindən çox qaçqın və məcburi köçkünün mənzil şəraiti yaxşılaşdırılıb. Bu işə 2,3 milyard manat vəsait sərf olunub. Bu kateqoriyadan olan insanların maddi rifahının yaxşılaşdırılması üçün dövlət proqramları qəbul edilib, onların sosial problemlərinin həllinə indiyədək 6,6 milyard manat vəsait xərclənib. Ötən dövrdə 200 min məcburi köçkün büdcə təşkilatlarında və digər sahələrdə daimi işlə təmin edilib. Bununla da məcburi köçkünlər arasında yoxsulluq həddi son 15 ildə 75 faizdən 12 faizədək azalıb. Məcburi köçkünlərin sosial müavinətlərinin artırılması istiqamətində mühüm tədbirlər görülüb. Bütün bunlar sübut edir ki, qaçqınların və məcburi köçkünlərin problemlərinin həlli dövlətimizin başçısı İlham Əliyevin diqqət mərkəzindədir.

Bu qəbildən olan soydaşlarımıza dövlət qayğısı siyasətinin əsasını ulu öndərimiz Heydər Əliyev qoyub. Ümummilli liderimiz Heydər Əliyev yenidən hakimiyyətə qayıdandan sonra qaçqınların və məcburi köçkünlərin sosial şəraitinin yaxşılaşdırılması məsələsini dövlət siyasətinin prioritetinə çevirdi. Ulu Öndərin təşəbbüsü ilə qaçqınların və məcburi köçkünlərin məskunlaşdırılması, onların sosial məsələlərinin həlli istiqamətində ciddi addımlar atıldı. Bu işə beynəlxalq donor təşkilatlar cəlb olundu, dövlət büdcəsindən vəsaitlər ayrıldı. Sonradan Neft Fondunda yığılan vəsaitlər hesabına qaçqın və məcburi köçkünlər üçün qəsəbələrin salınmasına başlanıldı və ölkəmizin iqtisadi gücü artdıqca bu proses daha geniş vüsət aldı. Birinci vitse-prezident Mehriban Əliyevanın təşəbbüsü ilə məcburi köçkünlərin mənzil-məişət şəraitinin yaxşılaşdırılması prosesinə özəl sektor da cəlb olunub. Bu, iş adamlarının sosial məsuliyyəti məsələsidir və onlar bu prosesə fəal qoşulublar.

Sualın ikinci hissəsinə gəlincə deməliyəm ki, bu gün 100 illik yubileyini qeyd etdiyimiz Azərbaycan Xalq Cümhuriyyətinin yaranması milli tariximizin ən parlaq səhifələrindən biridir. Azərbaycan Xalq Cümhuriyyəti 23 aylıq fəaliyyəti dövründə çox böyük işlər gördü. Əvvəla, xalqın milli mənlik şüurunu özünə qaytardı, onun öz müqəddəratını təyin etməyə qadir olduğunu nümayiş etdirdi, Azərbaycanın ilk parlamenti, hökuməti, dövlət rəmzləri yaradıldı. Bu dövlətin ən böyük nailiyyətlərindən biri də nəinki müsəlman Şərqində, hətta dünyanın bir sıra qabaqcıl ölkələrindən çox-çox əvvəl qadınlara seçib-seçilmək hüququnu verməsi olub ki, biz bununla bu gün fəxr edirik.

Təəssüf ki, Xalq Cümhuriyyəti bolşevik istilası nəticəsində süqut etdi, xalqımızın müstəqillik arzusu yarımçıq qaldı, çar Rusiyasının tərkibindən çıxan Azərbaycan Sovet İttifaqının tərkibinə düşdü. Bu işdə milli satqınlar, xəyanətkarlar da böyük rol oynadılar.

Əgər tarixi paralellər aparsaq görərik ki, Azərbaycan ötən əsrin 90-cı illərinin əvvəllərində müstəqilliyini bərpa edəndə də xəyanətkar insanların məkrli planlarına məruz qaldı. Müstəqil Azərbaycan dövləti yenə də parçalanmaq təhlükəsi ilə üz-üzə qaldı. Biz dövlət çevrilişi cəhdlərinin, təxribatların, Vətənə xəyanət edən insanların müxtəlif məkrli planlarının şahidi olduq. Lakin Ulu Öndərin qətiyyəti, yenilməz iradəsi, müdrikliyi, zəngin dövlətçilik təcrübəsi və uzaqgörən siyasəti bütün bu planları alt-üst etdi, Azərbaycanda sabitlik bərpa olundu, ölkə inkişaf yoluna qədəm qoydu.

Təəssüf ki, müasir müstəqil Azərbaycana qarşı sonralar da təzyiqlər və təhdidlər səngimədi. Buna 2013-cü ildə yaradılan və Azərbaycanı sevməyən qüvvələrin idarə etdiyi Milli Şuranı misal göstərmək olar. Xarici mənbələrdən maliyyələşən bu qurum Azərbaycanı sevməyən, öz şəxsi maraqlarını xalqın və dövlətin maraqlarından üstün tutan, verilən sədəqə naminə bütün dəyərlərdən üz döndərən, idrakı sönük Rüstəm İbrahimbəyovu hakimiyyətə gətirmək istəyirdi. Lakin Azərbaycan xalqının müdrikliyi sayəsində onların arzuları ürəklərində qaldı.

Siz Rüstəm İbrahimbəyovun adını çəkdiniz. İstərdik ki, onun “Qafqaz üçlüyü” filminə münasibət bildirəsiniz. Bu filmdə azərbaycanlılar “qəddar”, “vəhşi” kimi təqdim olunur.

-Söhbətimin əvvəlində tarixdən paralellər gətirdim. Tarixdə hadisələr zaman-zaman təkrar olunur. Ola bilər forması dəyişir, amma məzmun eyni qalır. Xarici kəşfiyyat orqanlarının, bizi sevməyən qüvvələrin istəyi ondan ibarətdir ki, Azərbaycan tabe olsun, kiminsə əsarətində olsun. Azərbaycanın gücünü, xalqımızın mərdliyini, mübarizliyini aşağılamaq istəyən qüvvələr var. Çox təəssüf ki, Azərbaycan dövlətinin hər cür qayğısı ilə əhatə olunan R.İbrahimbəyov xislətinə sadiq qalaraq təkcə dövlətimizi deyil, xalqımızı da aşağılayan xəyanətə yol verdi. Nə tarix, nə də xalqımız onun bu xəyanətkarlığını bağışlamayacaq. Bu nankorluğun kökündə nə dayanır?! Mən həmişə vurğulayıram - ola bilər müxalif fikir səsləndirəsən, ola bilər hansısa məmurun nöqsanını, qüsurunu deyəsən. Bu, ola bilər. Amma xalqa böhtan atmaq, onu aşağılamaq, təhqir etmək yolverilməz haldır. Bu məqamda Rüstəm İbrahimbəyov Əkrəm Əylislini də qabaqlayır, dövlətimizə, xalqımıza, millətimizə böhtan atır. Məgər o bilmirmi ki, Azərbaycanın 20 faiz torpağını Ermənistan işğal edib, XX əsrin Xocalı soyqırımını ermənilər törədib, işğal altındakı torpaqlarımızda bütün milli-mədəni irsimizi bədnam qonşularımız dağıdıb, talan edib, bir milyondan artıq soydaşımızı doğma yurdundan didərgin salaraq qaçqın və məcburi köçkünə çevirib?! Çox gözəl bilir. Amma onun xəyanətkar xisləti, xalqına nifrəti ona bunları deməyə imkan vermir. R.İbrahimbəyovun “Qafqaz üçlüyü” filmi xəyanətin, mənəviyyatın aşınmasının, öz xalqına nifrətin çox iyrənc bir nümunəsidir. Əgər R.İbrahimbəyov Azərbaycan xalqını bəyənmirsə, ona nifrət edirsə, bu xalqın fəxri adını daşıya bilməz. O, Azərbaycan dövləti tərəfindən verilmiş bütün titullardan, imtiyazlardan məhrum edilməlidir ki, digər satqınlara da dərs olsun.