Hamiliyə götürülən tələbələr AMEA Naxçıvan Bölməsində olublar
Naxçıvan, 22 dekabr, AZƏRTAC
Naxçıvan Muxtar Respublikası Ali Məclisi Sədrinin 2021-ci il 25 iyun tarixli “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər haqqında” Sərəncamının icrası ilə bağlı AMEA Naxçıvan Bölməsində növbəti görüş keçirilib.
Bölmənin mətbuat xidmətindən AZƏRTAC-ın Naxçıvan bürosuna bildirilib ki, bölmənin İncəsənət, Dil və Ədəbiyyat İnstitutunun təşkilatçılığı ilə keçirilən görüşdə Naxçıvan Dövlət Universitetinin Tarix və filologiya fakültəsinin Filologiya ixtisası üzrə təhsil alan tələbələri iştirak ediblər. Görüş zamanı institutun icraçı direktoru, filologiya üzrə fəlsəfə doktoru, dosent Elxan Məmmədov bildirib ki, 2021-ci il 25 iyun tarixli sərəncam muxtar respublikada fəaliyyət göstərən ali təhsil müəssisələri ilə müvafiq təşkilatlar arasında əməkdaşlığı genişləndirmək, peşəkar kadr potensialı hazırlamaq, tələbələrə elmi-nəzəri biliklərlə yanaşı, təcrübi biliklər də aşılamaq baxımından mühüm əhəmiyyət kəsb edir.
İncəsənət, Dil və Ədəbiyyat İnstitutunun icraçı direktoru diqqətə çatdırıb ki, institut əsas fəaliyyətini Naxçıvan memarlığının, şəhərsalma və abidələrinin tədqiqi, dekorativ tətbiqi sənət növlərini, musiqi və teatr mühitini, dialekt və şivələrini, onomastikasını, şifahi xalq ədəbiyyatını, ədəbi mühitini öyrənmək istiqamətində qurub. Ümumilikdə, 30 əməkdaşın çalışdığı institutda 7 elmi istiqamətli şöbə fəaliyyət göstərir. İnstitut əməkdaşları respublikamızda və xaricdə müxtəlif tədqiqat müəssisələri ilə əlaqələr yaradaraq səmərəli əməkdaşlıq edirlər. Gənc elmi işçilərin beynəlxalq və respublika səviyyəli elmi tədbirlərdə iştirakı, həmçinin əhəmiyyətli elmi jurnallarda məqalələrinin dərc olunması və digər məsələlər gündəmdə saxlanılaraq onlara lazımi istiqamət və tövsiyələr verilir. Gənclərin müxtəlif tədbir və müsabiqələrdə iştirakı da məhz bölmədə yaradılan şəraitin, uğurla icra edilən kadr hazırlığı işlərinin nəticəsidir.
Daha sonra Naxçıvan Dövlət Universitetinin Filologiya ixtisasının tələbələri institutun Folklorşünaslıq, Ədəbiyyatşünaslıq, Dilçilik və Onomastika şöbələrində aparılan tədqiqatlarla, əməkdaşların elmi fəaliyyəti ilə tanış olublar. Şöbələrin əməkdaşları tələbələri maraqlandıran sualları cavablandırıblar.
Yekunda tələbələr İnstitutun təşkilatçılığı ilə keçirilən Naxçıvanın dəyərli söz adamlarından olan şair-publisist Müzəffər Nəsirlinin anadan olmasının 110 illiyi ilə bağlı elmi konfransa qatılıblar.
Bölmənin digər xəbərləri
