Həkim-infeksionist: Virusun növündən asılı olaraq xəstəliyin əlamətlərində fərqlilik ola bilər
Bakı, 9 yanvar, AZƏRTAC
Qış fəslində havalar soyuyanda immun sisteminin zəifləməsi ilə əlaqədar olaraq infeksiyaların fəallığında artım müşahidə edilir. İlin bu mövsümündə həmişə bu halla üzləşmək mümkündür. Virus infeksiyalarının xarakterik xüsusiyyəti subfebril temperatur, bəzən də qəfildən başlanan 38 dərəcə С-dək yüksələn temperatur, boğaz ağrısı, burun axıntısı, kataral əlamətlər özünü göstərir. Virusun növündən asılı olaraq əlamətlərdə fərqlilik də ola bilər. Mədə-bağırsaq sisteminin funksional problemləri olduqda ishal, qarın ağrısı kimi şikayətlər ön plana keçir. Bəzi infeksiyalarda, yuxarı tənəffüs yolu infeksiyalarında burunda tutqunluq, boğazda və udqunmada ağrı, halsızlıq, ümumi əzələ ağrıları isə bütün virus infeksiyalarına xas olan əlamətlərdir. Xəstəliyin COVID-19-la oxşarlığı ola bilər. Lakin panikaya düşmək və bunun fonunda dərmanlardan lazımsız istifadə etmək immun sisteminə birbaşa vurulan zərbədir. Bəzi xəstələrdə ikili infeksiyalarla üzləşmək mümkündür, yəni xəstədə həm COVID-19, həm də influenza, yaxud rotavirus əlamətləri ola bilər. Bu, ona görə təhlükəlidir ki, immun sistemi ikiqat aşağı düşür və orqanizmin müqavimət qüvvəsi zəifləyir. Bunun nəticəsində xəstəliyin ağır keçirilməsi halı baş verə bilər, lakin bu zaman antibiotik dərmanlardan istifadə edilməsi yolverilən hal deyil.
AZƏRTAC xəbər verir ki, bu barədə həkim-infeksionist Natiq Əliyev yeni yayılan virus infeksiyaları barədə danışarkən deyib.
O, daha sonra bildirib: “Bakterial infeksiyadan fərqli olaraq virus mənşəli infeksiyaların yayılması daha sürətli gedir. Xəstəliyin ev və ya ambulator şəraitdə müalicə olunması kliniki şikayətlərdən asılıdır. Adətən virus mənşəli infeksiyalar evdə heç bir ciddi müalicələrə ehtiyac olmadan keçə bilən infeksiyalardır. Lakin ehtiyac yarandıqda, xüsusən də risk qrupunda olanlar, eləcə də ürək və ağciyərində problemi olanlar, xroniki, revmatoloji, endokrin xəstələri və əməliyyat olunanların xəstəliyi ağır keçirmək riski var. Belə xəstələr özlərini ağır hesab edirlərsə, mütləq şəkildə həkim müayinəsindən və laborator müayinədən sonra stasionar şəraitdə müalicə oluna bilər. Qalan hallarda laborator və ev şəraitində müalicə tövsiyə edilir.
Xəstəlikdən qorunmaq üçün mütləq şəkildə qrip əleyhinə peyvəndlərdən istifadə olunmalıdır. COVID-ə yoluxan xəstələrinin sayı sıfıra düşməyənə qədər onun aktivliyi davam edir və ona görə də bu məsələyə həssas yanaşmaq lazımdır. Maddələr mübadiləsinin sürətlənməsi və qidalanma immun sisteminin təbii qoruyucusudur. Bəzən yanlış olaraq hansısa vitamin kompleksindən istifadə etmək və ya hansısa dərmanı atmaqla orqanizmi gücləndirdiklərini düşünənlər olur. Bu, doğru yanaşma deyil. Düzgün maye balansı, yuxu rejimi, konservantlardan deyil, mövsümü qidalardan istifadə etmək immun sistemini gücləndirir. Belə sadə şərtlərə əməl etməklə virus infeksiyalarına qarşı döyüşkən orqanizm hazırlamaq mümkündür. Qapalı mühitdə çalışanlar vaxtaşırı olaraq otaqların havasını dəyişməlidirlər”.
Uşaqlarda virusa yoluxma riski barədə məlumat verən həkim-infeksionist deyib: “5 yaşınadək uşaqlar arasında yoluxmalar daha çox olur. İnfeksiyaya ən çox məktəbəqədər yaşda olan uşaqlarda rast gəlinir. Təmaslar nəticəsində yoluxanların sayı daha da artır. Klinik şikayətləri olan uşaqlar tədris müəssisəsindən ayrılmalı, həmin əlamətlər ötüşəndən sonra tədrisə davam etməlidir. Bəzən valideynlər qorxu fonunda uşaqlara antibakterial dərmanlar tətbiq etməyə başlayırlar. Bu, yolverilməzdir. Xəstələrin çox böyük əksəriyyəti bakterial deyil, virus infeksiyasına yoluxmuş olur. Virusun növü aşkarlandıqdan sonra çəkiyə uyğun olaraq dərmanların istifadəsi fərdi olaraq seçilə bilər. Uşaqların da qidalanma və maye balansını gücləndirməklə müdafiə mexanizmlərini təşkil etmək mümkündür”.
Bölmənin digər xəbərləri
