HƏMAS girov və əsirlərin mübadiləsinə dərhal başlamaqda maraqlıdır
Qahirə, 5 oktyabr, AZƏRTAC
HƏMAS Qəzza zolağında iki ildən artıq davam edən müharibənin dayandırılması, girov və məhbusların dərhal mübadiləsi üçün razılaşma əldə edilməsini çox istəyir.
AZƏRTAC “əl-Arabiyyə” telekanalına istinadla xəbər verir ki, bunu HƏMAS hərəkatının rəsmisi bildirib.
Hərəkatın adı açıqlanmayan rəsmisi, həmçinin deyib ki, İsrail ABŞ Prezidenti Trampın planının icrasına mane olmamalıdır. Onlar razılaşma əldə olunmasını istəyirlərsə, HƏMAS buna hazırdır. Eyni zamanda, qeyd olunub ki, sabah keçiriləcək danışıqlarda İsrailin Qəzzadan ilkin geriçəkilmə xətti barədə müzakirələr aparılacaq.
Qeyd olunmalıdır ki, bu yaxınlarda Ağ Ev Trampın Qəzza zolağında münaqişəyə son qoymaq üçün 20 bənddən ibarət “hərtərəfli” planını dərc edib. Plana əsasən, dərhal atəşkəs və 72 saat ərzində girovların azad edilməsi tələb olunur. HƏMAS və “digər qruplar” Qəzzanın idarə olunmasında birbaşa və ya dolayı yolla iştirak etməmək barədə razılığa gəlməlidir. Dinc yanaşı yaşamağa razı olan və silahlarını təhvil verən hərəkat üzvləri üçün amnistiya nəzərdə tutulur.
Trampın planına görə, həmçinin İsrail ömürlük cəza almış 250 fələstinli məhbusu və 2023-cü il oktyabrın 7-dən sonra Qəzzada tutulmuş 1700-dən çox fələstinlini azad etməlidir.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
