Heydər Əliyev öz xalqını zamanın mürəkkəb tarixi-siyasi sınaqlarından uğurla çıxarıb
Gəncə, 12 dekabr, AZƏRTAC
Gəncə Dövlət Universitetində (GDU) Ümummilli Lider Heydər Əliyevin anım gününə həsr edilən tədbir keçirilib.
AZƏRTAC-ın böglə müxbiri xəbər verir ki, tədbirdə əvvəlcə Dövlət Himni səsləndirilib, Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad olunub.
Sonra Ulu Öndər Heydər Əliyevin zəngin siyasi fəaliyyətinə həsr olunan videoçarx nümayiş etdirilib.
Gəncə Dövlət Universitetinin rektoru Yusif Yusibov çıxış edərək, Ümummilli Lider Heydər Əliyevin çoxşaxəli fəaliyyətindən, Azərbaycanın inkişafı, milli dövlətçiliyin gücləndirilməsi istiqamətində misilsiz tarixi xidmətlərindən danışıb. Rektor qeyd edib ki, Ümummilli Lider Heydər Əliyev öz xalqını zamanın mürəkkəb tarixi-siyasi sınaqlarından uğurla çıxarmış və ardıcıl mübarizə apararaq onu müstəqilliyə qovuşdurmuş qüdrətli şəxsiyyətdir. Heydər Əliyevin respublikamıza rəhbərlik etdiyi bütün dövrlər möhtəşəm quruculuq, tərəqqi və hərtərəfli inkişaf mərhələləri kimi şanlı tariximizin qızıl səhifələridir. Xalqımızın və dövlətimizin əldə etdiyi bütün uğurların təməlində Heydər Əliyev siyasəti və işıqlı əməlləri dayanır. 1993-cü ildə xalqın təkidli tələbi ilə Ümummilli Liderin hakimiyyətə qayıtması müasir tariximizdə dönüş nöqtəsi oldu. Ulu Öndər Azərbaycana müstəqillik, dövlətçilik, suverenlik və milli-mənəvi dəyərlərə qayıdışı bəxş etdi, ölkəyə sülh və sabitlik gətirdi, ordu quruculuğuna, iqtisadi inkişafa şərait yaratdı. Ulu Öndər Azərbaycanı tənəzzüldə olan dövlətdən inkişaf edən ölkəyə çevirdi. Ölkəmizin beynəlxalq nüfuzu sürətlə yüksəldi.
Rektor onu da qeyd edib ki, müasir, qüdrətli Azərbaycan məhz Ulu Öndərin görmək istədiyi azad, müstəqil, ərazi bütövlüyü təmin olunmuş Azərbaycandır. Dövlət başçısı İlham Əliyev Ümummilli Lider Heydər Əliyevin siyasi xəttinə sadiq qalaraq, müstəqil ölkəmizi daha uğurlu və işıqlı gələcəyə doğru aparır.
Sonra Humanitar məsələlər üzrə prorektor Gülsüm Fətəliyevanın “Əbədiyaşar Lider”, Sosial fənlər kafedrasının müdiri Cavid Bağırzadənin “Ulu Öndər Heydər Əliyev ideyaları və qalib Azərbaycan”, Ümumi tarix kafedrasının müdiri Etibar Musayevin “Azərbaycana həsr edilən ömür”, Azərbaycan tarixi kafedrasının baş müəllimi Eldar Mehdiyevin “Ümummilli Liderin şərəfli ömür yolu” mövzularında məruzələri dinlənilib.
Tədbirdə Universitetin Elm və innovasiyalar üzrə prorektoru, deputat Pərvin Kərimzadə çıxış edib. Bildirib ki, Ulu Öndər Heydər Əliyevin əsasını qoyduğu dövlət və ordu quruculuğunun məntiqi nəticəsi 44 günlük Vətən müharibəsində özünü göstərdi. II Qarabağ müharibəsi Ümummilli Liderin layiqli davamçısı Prezident İlham Əliyevin uzaqgörən müdrik siyasəti nəticəsində Azərbaycanın parlaq Qələbəsi ilə başa çatdı.
Çıxış edənlər vurğulayıblar ki, Azərbaycan xalqı hər zaman Ulu Öndər Heydər Əliyevin əziz xatirəsini ehtiramla yad edəcək.
Bölmənin digər xəbərləri
