HOLLANDİYADA XOCALI FACİƏSİNƏ HƏSR OLUNMUŞ ABİDƏNİN AÇILIŞI OLACAQDIR
AZƏRTAC xəbər verir ki, fevralın 24-də Hollandiyanın Haaqa şəhərində Xocalı faciəsinə həsr olunmuş abidənin açılışı olacaqdır.
Xarici Ölkələrdə Yaşayan Azərbaycanlılarla İş üzrə Dövlət Komitəsindən bildirmişlər ki, “Kamperfoeliestraat” parkında qoyulan abidə Hollandiya-Azərbaycan-Türk Kültür Dərnəyinin ən böyük layihələrindən biridir. Məqsəd Xocalı soyqırımını Hollandiya ictimaiyyətinin və bu ölkəyə gələn qonaqların diqqətinə çatdırmaqdır.
Abidədə körpəsini erməni qəsbkarlarından qorumaq üçün başının üzərinə qaldıran ana təsvir olunmuşdur.
Dövlət Komitəsinin dəstəyi ilə ucaldılan, hündürlüyü 2 metrə yaxın olan abidənin ətrafındakı böyük bir sahədə bağ salınacaqdır.
Xocalı soyqırımı ilə bağlı Azərbaycandan kənarda ucaldılacaq ilk abidənin açılış mərasimində Dövlət Komitəsinin nümayəndələri, diplomatik korpusun əməkdaşları, Azərbaycan və türk diasporlarının təmsilçiləri iştirak edəcəklər.
######
Bölmənin digər xəbərləri
