HONKONQLU MİLYARDER “BİRMİNGEM” KLUBUNUN SƏHMLƏRİNİN 40 FAİZİ MÜQABİLİNDƏ 81 MİLYON FUNT TƏKLİF EDİR
Bakı, 21 avqust (AZƏRTAC). Honkonqlu milyarder Karson Yeun “Birmingem” klubunun səhmlərinin 40 faizi müqabilində bu klubun sahiblərinə 81,5 milyon funt sterlinq təklif etmişdir. Əgər Yeunun bu təklifi qəbul edilsə, ona məxsus “Grandtop İnternational Holdings Limited” investisiya şirkəti həmin pulları “göylər” adı ilə məşhur olan klubun səhmlərinin indiki sahiblərinin hesabına köçürəcək və bu şirkət faktiki olaraq Britaniya komandasının sahibinə çevriləcəkdir.
Honkonq şirkətinin bəyanatında deyilir: “Bu təklif “Birmingem”in bu əqdə aid səhmlərinin hər birinin qiymətinin 100 pens olması nəzərdə tutulmaqla irəli sürülmüşdür”.
Əgər əqd baş tutarsa, Yeun “Birmingem”in səhmlərinin təqribən 79,91 faizinin sahibi olacaqdır. Klubun səhmlərinin qalan hissəsi Birmingem şəhərinin hakim dairələrinə və onlara yaxın şirkətlərə məxsusdur. Xatırladaq ki, honkonqlu biznesmen iki il bundan əvvəl də buna oxşar təklif etmiş, lakin o vaxt rədd cavabı almışdı. Klubun indiki əsas səhmdarları Devid Sallivan və Ralf Qold o vaxt “Birmingem”in gələcək sahibinin etibarlılığına əmin olmadığı üçün səhmləri satmağa razılıq verməmişdirlər.
İki il bundan əvvəl Britaniya komandasının səhmlərinin hər birinə 55 pens qiymət qoyulmuşdu. İndi isə bu səhmlərin hər birinin bazar dəyəri artaraq 90,5 pensə çatmışdır. Hazırda “Grandtop İnternational” şirkəti “Birmingem”in səhmlərinin 29,9 faizinin sahibidir.
Bölmənin digər xəbərləri
