IBM: Maliyyə sektorunda süni intellektlə ağıllı həllərə keçid vacibdir
Bakı, 29 sentyabr, AZƏRTAC
Maliyyə sektorunda rəqəmsal transformasiyanın sürətlənməsinə baxmayaraq, hələ də görüləcək işlər çoxdur. Gələcəkdə əsas məqsəd sadəcə rəqəmsallaşmaq deyil, intellektual xidmətlərə keçid etməkdir.
AZƏRTAC xəbər verir ki, bunu IBM şirkətinin data və süni intellekt həllərinin inkişaf etdirilməsi üzrə rəhbəri Inigo Cavestany "InMerge" İnnovasiya Sammitində çıxışı zamanı deyib.
Onun sözlərinə görə, banklar uzun illər ərzində topladıqları məlumatlar, tətbiqlər və layihələrlə zəngin irsə malikdir və bunların tamamilə kənara atılması düzgün deyil.
“Biz müştərilərimizin biznes proseslərini, məlumatlarını və tətbiqlərini nəzərə alaraq onlara dəyərli tərəfdaşlıq təklif edirik. IBM-in texnoloji təcrübəsini onların sahə bilikləri ilə birləşdirərək çətinlikləri həll etməyə çalışırıq. Süni intellektin tətbiqi prosesində bir çox vəzifələr avtomatlaşdırılır ki, bu, həm müsbət nəticələr, həm də risklər yaradır. Bizim üçün əsas məsələ texnologiyanın faydasını maksimum dərəcədə artırmaqla yanaşı, avtomatlaşdırılmış mühitdə ehtiyatlı olmaqdır”, - deyə Inigo Cavestany vurğulayıb.
Bölmənin digər xəbərləri
