İçməli suyun ən bahalı olduğu ölkələrin reytinqi açıqlanıb
Bakı, 16 iyul, AZƏRTAC
Birləşmiş Ştatlar içməli suyun ən yüksək qiymətə təklif edildiyi ilk on ölkə sırasında yer alan yeganə böyük iqtisadiyyatdır. Belə ki, ABŞ-da 1,5 litrlik su şüşəsi 2,19 dollara satılır. Qeyd edək ki, Birləşmiş Ştatlar bu reytinq cədvəlində ən bahalı səkkizinci ölkədir. Bununla belə, hətta bu qiymət siyahının mütləq lideri olan Monakodan təxminən üç dəfə aşağıdır; burada analoji həcmdə suyun qiyməti 5,8 dollardır.
AZƏRTAC xarici mediaya istinadla xəbər verir ki, ən bahalı içməli su satılan ilk onluğa daxil olan ölkələrin əksəriyyəti Karib hövzəsi və Afrika qitəsində yerləşir. Onların arasında Antiqua və Barbuda (1,5 litr üçün 2,59 dollar), Mərkəzi Afrika Respublikası (2,49 dollar), Barbados (2,48 dollar), Baham adaları (2,41 dollar), Kosta-Rika (2,35 dollar), Qrenada (2,26 dollar) və Eritreya (2,14 dollar) var. İlk onluğu 1,5 litr içməli su üçün 2,04 dollar qiymətlə İslandiya qapayır.
Araşdırma göstərib ki, 77 ölkədə 1,5 litr şirin suyun qiyməti bir dolları ötür. Maraqlıdır ki, Şimali Afrika ölkələri içməli suyun ən sərfəli şərtlərlə satıldığı dövlətlər sırasında yer alıb; tələbatının böyük hissəsini Nil çayı hesabına təmin edən Misirdə bu qiymət cəmi 18 sent, Liviyada isə 24 sentdir.
Bölmənin digər xəbərləri
