“İƏT Modeli – 2023” proqramının bağlanış mərasimi keçirilib
Bakı, 14 iyun, AZƏRTAC
İyunun 14-də İslam Əməkdaşlıq Gənclər Forumu Avrasiya Regional Mərkəzinin (İƏGF-ARM) təşəbbüsü və Gənclər və İdman Nazirliyinin dəstəyi ilə 12 ildir uğurla həyata keçirilən “İslam Əməkdaşlıq Təşkilatı (İƏT) Modeli - Beynəlxalq Münasibətlər Akademiyası” layihəsinin 2023-cü il mərhələsinin bağlanış və qaliblərin təltif olunması mərasimi keçirilib.
AZƏRTAC xəbər verir ki, əvvəlcə dövlət orqanları nümayəndələrinin, Milli Məclisin deputatları, eləcə də İƏT ölkələri səfirlikləri, KİV-lər və QHT nümayəndələrinin iştirakı ilə keçirilən tədbirdə İƏT Modelinin fəaliyyəti ilə bağlı qısa videoçarx nümayiş etdirilib.
İƏGF Avrasiya Regional Mərkəzinin baş direktor vəzifələrini icra edən Vüsal Qurbanov proqramın əsas məqsəd və vəzifələri haqqında məlumat verərək Azərbaycan gənclərinin liderlik qabiliyyətini artırmaq üçün son illərdə İƏT Modelinə olan marağın artmasından bəhs edib.
Gənclər və idman nazirinin müavini Fərhad Hacıyev, Xarici İşlər Nazirliyinin Orta Şərq və Afrika İdarəsinin rəisi Rəşad İsmayılov, Kiçik və Orta Biznesin İnkişafı Agentliyi İdarə Heyəti sədrinin müavini Hikmət Məmmədov, diplomatik korpus adından Mərakeş krallığının Azərbaycandakı səfiri Məhəmməd Adil Embarç, Milli Məclisin deputatı İlham Məmmədov, Azərbaycan Dövlət İqtisad Universitetinin Beynəlxalq Əməkdaşlıq departamentinin rəhbəri Nərmin İbrahimova təbrik nitqləri ilə çıxış edərək bu proqramın əhəmiyyətindən, gənclərin liderlik qabiliyyətlərinin formalaşmasında oynadıqları roldan bəhs ediblər, eləcə də bu il kursu bitirən tələbələrə uğurlar arzulayıblar.
Tədbirin sonunda bu ilin mayında İƏT xarici işlər nazirlərinin konfransını simulyasiya edən oyunlarda xüsusi istedadı ilə seçilən tələbələr və müxtəlif İƏT ölkələrini təmsil edən komandalar xüsusi hədiyyə və sertifikatlarla təltif ediliblər.
Simulyasiya oyunlarında İƏT məkanında aktual xarakter kəsb edən münaqişələrlə bağlı müzakirələr aparılıb və müvafiq qətnamələr qəbul edilib.
Qeyd edək ki, bu ilin aprel-may aylarında Azərbaycan Dövlət İqtisad Universitetində keçirilən mühazirələrdə İƏT-in bir sıra ölkələrinin Azərbaycandakı səfirləri və aparıcı dövlət qurumları və ali məktəb nümayəndələri tələbələr qarşısında mühazirələrlə çıxış edərək onları maraqlandıran sualları cavablandırıblar.
“İƏT Modeli” proqramının əsas məqsədləri İƏT məkanında gənclərin beynəlxalq əməkdaşlığının güclənməsinə dəstək vermək, gənclərin və gənclər təşkilatları rəhbərlərinin və üzvlərinin diplomatiya, idarəetmə, kommunikasiya sahəsində yeni bilik və təcrübə əldə etməsinə yardım etməkdir.
Proqrama əsasən iki ay ərzində keçirilən mühazirələrdən sonra tələbələr “İƏT Modeli XİN konfransı” adlanan simulyasiya oyunlarında iştirak edir və münsiflər heyətinin qərarı ilə xarici dil qabiliyyəti və xüsusi yaradıcılıq bacarığı ilə seçilən tələbələr “Beynəlxalq İƏT Modeli” yarışmasında Azərbaycanı təmsil etmək hüququ qazanırlar.
Bölmənin digər xəbərləri
