İğdırda Xocalı soyqırımı qurbanlarının xatirəsi anılmışdır
Bakı, 21 fevral (AZƏRTAC). Fevralın 20-də Türkiyənin İğdır vilayətində “Müsbət Düşüncə Platforması” tərəfindən Xocalı soyqırımı qurbanlarının xatirəsini anma mərasimi keçirilmişdir.
AZƏRTAC Türkiyənin Anadolu agentliyinə istinadla xəbər verir ki, Azərbaycan və türk icmaları nümayəndələrinin iştirak etdikləri mərasimdə bir gecənin faciəsi, erməni vandallarının günahsız insanların başına gətirdikləri müsibətlər barədə ətraflı məlumat verilmişdir.
İğdır Universitetinin müəllimi Aslantürk Akyıldız və Azərbaycanın Qarsdakı baş konsulluğunun İğdır üzrə nümayəndəsi Rafiq Rüstəmoğlu çıxış edərək türk və Azərbaycan diasporunu gücləndirməklə Ermənistanın Azərbaycan torpaqlarında törətdiyi soyqırımın və erməni vəhşiliyinin dəhşətli nəticələrini dünya ictimaiyyətinə çatdırmağın vacibliyini qeyd etmişlər.
Ermənilərin regionda 1918-ci ildən başlayaraq Türkiyə və Azərbaycan ilə düşmənçilik etdiklərini bildirən A.Akyıldız, xain qonşuların buna baxmayaraq özlərinin “qondarma soyqırım” siyasəti ilə dünya ictimaiyyətini çaşdırmağa çalışdıqlarını vurğulamışdır.
Tədbirdə Xocalı qırğınının ötən əsrin ən dəhşətli soyqırımlarından biri olduğu, bu faciənin qurbanlarının xatirəsinin hər il dünyanın hər bir yerində yad edildiyi bildirilmişdir.
Bölmənin digər xəbərləri
