İlahiyyat İnstitutunda ilk dərslər Xocalı soyqırımına həsr olunub
Bakı, 26 fevral, AZƏRTAC
Azərbaycan İlahiyyat İnstitutunda (Aİİ) bu gün ilk dərslər Xocalı soyqırımına həsr olunub.
İnstitutdan AZƏRTAC-a bildirilib ki, müəllimlər 27 il bundan əvvəl Xocalı sakinlərinə qarşı erməni silahlı birləşmələrinin və sovet ordusunun 366-cı motoatıcı alayının iştirakı ilə törədilən faciənin dəhşətlərindən söz açıblar. Dərslərdə Xocalı soyqırımı haqqında həqiqətləri çatdırmaq məqsədilə müxtəlif fotolar, faciəni özündə əks etdirən sənədli filmlər nümayiş olunub.
Azərbaycan İlahiyyat İnstitutu tələbələrin vətənpərvərlik ruhunun gücləndirilməsi və milli ruhda yetişməsi, milli təəssübkeşliyin, torpağa bağlılığın, dövlətə sevginin aşılanması, ölkəmizin müstəqilliyi uğrunda mübarizədə canlarını qurban verən vətən övladlarının yad edilməsi məqsədilə ardıcıl silsilə tədbirlər həyata keçirir.
Qeyd edək ki, ali təhsil müəssisəsində fevralın 18-də “Erməni təcavüzünün tanıdılması” İctimai Birliyi tərəfindən lentə alınan “Xocalıda məhv olmuş 8 ailə” filmi nümayiş olunub.
Bölmənin digər xəbərləri
