İndoneziya Ermənistan qoşunlarının Dağlıq Qarabağdan çıxarılmasını istəyir
Cakarta, 5 oktyabr, AZƏRTAC
İndoneziyanın nüfuzlu “kompasiana.com” saytında tanınmış jurnalist Veeramalla Anjaiahın “İndoneziya Ermənistan qoşunlarının Dağlıq Qarabağdan çıxarılmasını istəyir” sərlövhəli məqaləsi dərc olunub.
AZƏRTAC xəbər verir ki, məqalədə müsəlmanlarla yanaşı, digər dinlərin nümayəndələrinin birgə yaşadığı Azərbaycanla Ermənistan arasında Dağlıq Qarabağdakı müharibənin ikinci həftəsində hərbçilər və mülki şəxslər arasında itkilərin qeyd olunub. Beynəlxalq səviyyədə Azərbaycanın ərazisi kimi tanınan Dağlıq Qarabağ regionunun illərdir Ermənistan ordusu tərəfindən qeyri-qanuni işğal altında saxlanıldığı vurğulanıb. Ermənistanın Azərbaycanın bir sıra şəhər və kəndlərini raket, minaatan, artilleriya qurğularından atəşə tutduğu, Azərbaycanın mülki əhalisi arasında itkilərin artmasının narahatlıq doğurduğu bildirilib.
Oktyabrın 5-də Ermənistan silahlı qüvvələrinin Azərbaycanın sənaye şəhəri olan Mingəçeviri raket hücumuna məruz qoyduğu qeyd edilib, Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyevin bununla bağlı “Twitter” hesabındakı məlum paylaşımına istinad edilib. Bundan bir gün əvvəl isə Azərbaycanın ikinci böyük şəhəri Gəncənin də Ermənistan silahlı qüvvələrinin eyni hücumuna məruz qaldığı, məktəb, xəstəxana binaları ilə yanaşı, çoxlu sayda evin dağıdıldığı, dinc əhalinin zərər çəkdiyi bildirilib.
İndoneziyanın Cənubi Qafqazda baş verən müharibə ilə bağlı ciddi narahatlığını bildirdiyini qeyd edən müəllif bu ölkənin Xarici İşlər Nazirliyinin münaqişənin BMT Təhlükəsizlik Şurasının qətnamələri çərçivəsində həllinə tərəfdar olması ilə bağlı rəsmi “Twitter” hesabındakı paylaşımını xatırladıb.
Müəllif BMT Təhlükəsizlik Şurasının Ermənistanın silahlı qüvvələrini Azərbaycanın Dağlıq Qarabağ və ona bitişik ərazilərdən dərhal çıxarmasına dair 4 qətnaməsinə baxmayaraq, 20 ildən çox müddət ərzində Ermənistanın bu qətnamələrdən irəli gələn qərarları yerinə yetirmədiyini xüsusilə vurğulayıb, hazırda bölgədə baş verən müharibənin başlıca səbəbkarının ermənilər olduğunu bildirib. Ermənistanın baş naziri N.Paşinyanın erməni xalqının diqqətini ölkəsinin iqtisadi və sosial problemlərdən yayındırmaq üçün müharibəyə çıxış yolu kimi baxdığını qeyd edib.
Yazıda İndoneziyanın Azərbaycandakı keçmiş səfiri Hüsnan Fənaninin “İndoneziya Azərbaycanın ərazi bütövlüyünə hörmətlə yanaşır və Dağlıq Qarabağı Azərbaycanın ərazisi olaraq tanıyır. BMT Təhlükəsizlik Şurasının məlum qətnamələri Dağlıq Qarabağın işğal edilmiş Azərbaycan torpaqları olduğunu açıq şəkildə qeyd edir” sözlərinə də yer verilib.
Müəllif məqaləsində, eyni zamanda, Azərbaycanın İndoneziyadakı səfiri Cəlal Mirzəyevin İndoneziyanın Azərbaycanın ərazi bütövlüyünü açıq şəkildə dəstəklədiyinə görə bu ölkəyə və onun xalqına minnətdarlığını ifadə etdiyini xatırladıb.
Məqalədə, habelə Sanjeevini Pertivinin “Ermənistan Dağlıq Qarabağdakı azərbaycanlıları öz yurdlarından məcburi köçməyə məruz qoyub, Xocalıda silahsız mülkü əhaliyə, qadınlara, uşaqlara və yaşlılara qarşı soyqırımı həyata keçirib” sözləri də yer alıb.
Müəllif qarşıdurmanın dayandırılması üçün Azərbaycan Prezidenti İlham Əliyevin irəli sürdüyü şərti də oxucuların diqqətinə çatdırıb: “Tək bir şərtimiz var. Erməni silahlı qüvvələri qeyd-şərtsiz Azərbaycan torpaqlarını tamamilə və dərhal tərk etməlidirlər”.
Məqalədə, həmçinin Azərbaycanın işğaldan azad olunan şəhər və kəndləri haqqında məlumatlar da yer alıb.
Vüqar Ağayev
AZƏRTAC-ın xüsusi müxbiri
Cakarta
Bölmənin digər xəbərləri
