İndoneziyada Xocalı soyqırımının 21-ci ildönümünə həsr olunmuş seminar keçiriləcəkdir

19.02.2013 [17:53]
Çap et
A⁺ A^-

Bakı, 19 fevral (AZƏRTAC). Azərbaycanın İndoneziyadakı səfirliyinin, dünyanın ən böyük QHT-si olan “Nahdlatul Ulama” (NU) və İndoneziya Universitetinin birgə təşkilatçılığı ilə fevralın 28-də Xocalı soyqırımının 21-ci ildönümünə həsr olunmuş seminar keçiriləcəkdir.

Səfirlikdən AZƏRTAC-a bildirmişlər ki, Dialoq və Əməkdaşlıq Uğrunda İslam Konfransı Gənclər Forumunun iştirakı ilə keçirilən seminarda İndoneziya Parlamentinin sədrinin, ictimai, din və elm xadimlərinin, universitetin professor-müəllim heyətinin, Azərbaycan və Türkiyə diasporlarının nümayəndələrinin, həmçinin İslam Əməkdaşlıq Təşkilatının (İƏT) üzvü olan ölkələrin İndoneziyada akkreditə olunmuş səfirlərinin iştirakı nəzərdə tutulmuşdur.

Tədbirin məqsədi Xocalı faciəsinin anma mərasimi ilə yanaşı, 2012-ci ilin yanvarında İndoneziyada İƏT Parlamentlər İttifaqının iclasında qəbul edilmiş və soyqırımını tanımağa çağıran “15-PE/7-CONF” saylı qətnamənin tətbiq olunmasına təkan verməkdir.

İndoneziyanın Prezidentinə və parlamentinin sədrinə təqdim olunması üçün hazırlanmış Xocalı soyqırımının tanınmasına dair müraciətə imza toplanması kampaniyası seminarda başa çatacaqdır. Sonra isə müraciət müvafiq ünvanlara təqdim olunacaqdır.

Qeyd edək ki, müraciəti, həmçinin 30-dan artıq müxtəlif partiyaları təmsil edən parlament üzvləri imzalamışlar.

Seminarda Xocalı soyqırımına dair videoçarx göstəriləcək, iştirakçılara faciəyə dair kitablar, broşürlər təqdim olunacaqdır.