ELM VƏ TƏHSİL
İNFORMASİYA TEXNOLOGİYALARININ TƏHSİLDƏ İNKİŞAFI İLƏ BAĞLI DƏYİRMİ MASA KEÇİRİLMİŞDİR
AZƏRTAC-ın müxbiri xəbər verir ki, tanınmış alim və pedaqoqların, mütəxəssislərin iştirak etdiyi tədbiri təhsil naziri Misir Mərdanov açaraq bu gün hər bir ölkənin intellektual və elmi potensialının əsas göstəricisi olan informasiya və kommunikasiya texnologiyalarının cəmiyyətin inkişafındakı müstəsna rolundan danışmışdır.
Ölkəmizin orta ümumtəhsil məktəblərində informasiya texnologiyaları ilə bağlı məlumat verən nazir hazırda hər 1047 şagirdə bir müasir kompüter düşdüyünü bildirmişdir. O, Azərbaycan Prezidentinin tapşırığına əsasən 2005-2007-ci illərdə məktəblərin kompüterləşdirilməsi proqramının hazırlandığını diqqətə çatdırmış və bildirmişdir ki, bu proqram həyata keçiriləndən sonra respublikamızdakı hər bir orta ümumtəhsil məktəbində ayrıca kompüter sinifi yaradılacaq və hər 48 şagirdə bir kompüter düşəcəkdir.
Nazir eyni zamanda, təhsil ocaqlarının mövcud problemlərindən də danışmış və informasiya texnologiyalarını inkişaf etdirmək üçün xüsusi proqram hazırlanmasının vacibliyini söyləmişdir.
Rabitə və İnformasiya Texnologiyaları naziri, akademik Əli Abbasov çıxış edərək informasiya texnologiyalarının təhsildə inkişafının və məktəblərin kompüterləşdirilməsi proqramının əhəmiyyətindən söhbət açmışdır.
AMEA-nın Kibernetika İnstitutunun direktoru, akademik Telman Əliyev, Tələbə Qəbulu üzrə Dövlət Komissiyasının sədr müavini Namiq Babayev, AMEA-nın İnformasiya Texnologiyaları İnstitutunun direktoru, professor Rasim Əliquliyev və başqaları informasiya cəmiyyəti və onun yaradılmasının əsas prinsiplərindən və əhəmiyyətindən danışmışlar.
Sonra informasiya texnologiyalarının təhsildə inkişafı ilə bağlı müzakirələr aparılmış, təkliflər verilmişdir.