İQTİSADİYYAT
“İnnovasiya” işçi qrupunun növbəti iclası keçirilib
Bakı, 6 fevral, AZƏRTAC
“İnnovasiya” işçi qrupunun növbəti iclası keçirilib.
Rəqəmsal İnkişaf və Nəqliyyat Nazirliyindən AZƏRTAC-a bildirilib ki, işçi qrupa daxil olan dövlət qurumları nümayəndələrinin qatıldığı iclasda İqtisadi İslahatların Təhlili və Kommunikasiya Mərkəzi (İİTKM) tərəfindən aparılmış monitorinq və qiymətləndirmənin ilkin nəticələri geniş müzakirə edilib, qarşıya qoyulmuş vəzifələrin vaxtında və daha keyfiyyətlə icrası istiqamətində təklif və tövsiyələr səsləndirilib. Eyni zamanda icrası tamamlanmamış tədbirlər üzrə qarşıya çıxan çətinliklər dinlənilib və işlərin 2025-ci ildə yekunlaşdırılmasına dair təkliflər və tapşırıqlar verilib.
Məlumat üçün bildiririk ki, İİTKM tərəfindən aparılmış monitorinq və qiymətləndirmənin ilkin nəticələrinə əsasən, 2024-cü ildə müəyyən edilmiş hədəflər üzrə işlərin təxminən 80 faizi icra edilib.
Bununla yanaşı, qeyd etmək istərdik ki, “Azərbaycan Respublikasının 2022-2026-cı illərdə sosial-iqtisadi inkişaf Strategiyası” tədbirlərinin tam və vaxtında icrasını təmin etmək və aidiyyəti dövlət qurumlarının fəaliyyətinin əlaqələndirilməsi məqsədilə Nazirlər Kabinetinin 2022-ci il 12 iyun tarixli 487s nömrəli Sərəncamı ilə müxtəlif işçi qrupları, o cümlədən Strategiyanın 3.2-ci Məqsədinin yerinə yetirilməsi istiqamətində “İnnovasiya” işçi qrupu yaradılıb.
“İnnovasiya” işçi qrupuna sədrliyi rəqəmsal inkişaf və nəqliyyat nazirinin müavini Samir Məmmədov edir və işçi qrupda İİTKM, İqtisadiyyat, Elm və Təhsil, Xarici İşlər, Maliyyə, Əmək və Əhalinin Sosial Müdafiəsi, Ədliyyə, Müdafiə Sənayesi, Kənd Təsərrüfatı, Mədəniyyət və Energetika nazirlikləri, həmçinin Mərkəzi Bank, Dövlət Gömrük Komitəsi, Diasporla İş üzrə Dövlət Komitəsi, Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi, Dövlət Su Ehtiyatları Agentliyi, Dövlət Miqrasiya Xidməti, Dövlət Sərhəd Xidməti, Əqli Mülkiyyət Agentliyi və AMEA-nın rəhbər şəxsləri təmsil olunurlar.
Bölmənin digər xəbərləri
