İqtisadçı alim: Neftin qiymətindəki ucuzlaşmanın heç bir iqtisadi əsası yoxdur
Bakı, 14 sentyabr, AZƏRTAC
Neftin qiymətlərinin dünya bazarlarında iki dəfədən çox aşağı düşməsinə və onun hasilatının azalmasına baxmayaraq, Azərbaycan iqtisadiyyatı özünün inkişaf tempini qoruyub saxlayır.
Aparılan müşahidələr və təhlillər göstərir ki, dünya bazarlarında neftin kəskin ucuzlaşması prosesinin arxasında siyasi motivlər dayanır. Qiymətlərdə müşahidə olunan dəyişikliklərin heç bir iqtisadi əsası yoxdur. Lakin bunun siyasi oyun olduğunu onu təşkil edənlər heç vaxt etiraf etməyəcək və öz təbliğat maşınları vasitəsilə neftin dünya bazarlarında qiymətlərinin aşağı düşməsinin yalnız iqtisadi proseslərlə əlaqədar olduğunu sübut etməyə çalışacaqlar.
Bu sözləri AZƏRTAC-a “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov dünya bazarlarında neftin kəskin ucuzlaşmasının səbəbləri barədə fikirlərinı açıqlayarkən deyib. Professor qeyd edib ki, məsələnin kökündə dünya güclərinin mövqe savaşı dayanır və bu savaşda neft amilindən də təsir vasitəsi kimi istifadə olunur.
Bu gün ABŞ-dan başqa neftin qiymətlərinin yaxın gələcəkdə necə dəyişəcəyini və bu prosesin nə qədər davam edəcəyini heç kəs söyləyə bilməz. Bu oyunu onlar oynayırlar və nə vaxt harada dayanacaqlarını da özləri bilirlər.
Əlbəttə ki, bu cür məsələləri Azərbaycan Prezidenti İlham Əliyev hamıdan yaxşı bilir və elə bu səbəbdəndir ki, bir neçə gün öncə keçirilən müşavirədə neftin qiymətlərinin dünya bazarlarında kəskin aşağı düşməsinə münasibət bildirərkən deyib: “Mütəxəssislər, təhlilçilər bunun səbəblərini araşdırmalıdırlar. Ancaq istisna edilmir ki, bu da siyasi sifarişin nəticəsidir”.
Dünya iqtisadi məkanında baş verənlərin Azərbaycana təsirinə gəlincə, F.Yusifov qeyd edib ki, ölkəmiz heç bir halda bu proseslərdən uzaqda dayana bilməzdi: “Unutmamalıyıq ki, neftin qiymətləri ətrafında son bir ildə baş verən dəyişikliklər iqtısadi cəhətdən inkişaf edən və iqtisadiyyatı neftlə bilavasitə bağlı olmayan ölkələrə də təsir göstərib. Həmin ölkələrin bəzisində milli valyutalar bu və ya digər dərəcədə devalvasiyaya uğrayıb. Bu isə onu göstərir ki, haqqında bəhs etdiyimiz proses təkcə neft hasil edən ölkələri əhatə etmir”.
F.Yusifov hesab edir ki, Azərbaycan hökumətinin apardığı düşünülmüş iqtisadi siyasət bu proseslərin az ağrılı keçməsinin təminatçısıdır: “Neftin qiymətlərinin iki dəfədən də çox aşağı düşməsinə baxmayaraq, Azərbaycanda bütün sosial proqramlar icra olunur. Beynəlxalq maliyyə qurumları Azərbaycandakı iqtisadi durumu yüksək dəyərləndirirlər. Prezident İlham Əliyevin dediyi kimi, bizim bütün uğurlarımızın yalnız neftdən qaynaqlandığını deyən bədxahlar indi heç olmasa gözlərini açıb görsünlər ki, neftin qiymətlərinin dünya bazarlarında iki dəfədən çox aşağı düşməsinə və onun ölkə daxilində hasilatının azalmasına baxmayaraq, Azərbaycan iqtisadiyyatı özünün inkişaf tempini qoruyub saxlayır. Heç kəsin şübhəsi olmasın, Azərbaycan iqtisadiyyatı neftsiz də inkişaf edəcək. Beynəlxalq təşkilatların Azərbaycanın neftsiz iqtisadi inkişafına verdiyi qiymətdən sonra xaricdəki bədxahların və onların Azərbaycandakı əlaltılarının nə düşündüyü və ya danışdığı heç bir əhəmiyyət kəsb etmir. Bu gün dünyada baş verən iqtisadi və siyasi proseslər fonunda bir çox ölkələrdə yaranmış dözülməz vəziyyət, qanlı toqquşmalar və bunun nəticəsi olaraq milyonlarla insanın qaçqın kimi özünə sığınacaq axtarması, qoy hər kəsi düşündürsün. Bu gün Azərbaycandakı iqtisadi, siyasi sabitliyin, əminamanlığın nə demək olduğunu hər kəs dərk etməlidir. Dəfələrlə demişik, bir daha təkrar edirik. Qərb Azərbaycanı öz təsiri altında görmək istəyir. Baxın, ABŞ öz istəklərini reallaşdırmaq üçün son illər ərzində yaxın Şərqin bir neçə ölkəsini qan çanağına döndərdi. İndi bu ölkələrdə hər gün yüzlərlə insan müxtəlif toqquşmaların, terrorun qurbanına çevrilir. Qərb öz istəyini reallaşdırmaq naminə Azərbaycanı da məmnuniyyətlə İraqın, Misirin, Əfqanıstanın gününə salmağa hazırdır. Əlləri çatmır, iddialarını reallaşdıra bilmirlər deyə, Azərbaycanda guya insan haqlarının qorunmadığına, söz azadlığının olmadığına dair əsassız bəyanatlar verir, hesabatlar yayırlar. Azərbaycanda söz azadlığının olmadığını deyənlər bircə dəfə buradakı müxalifət mətbuatını oxusunlar, onda görərlər ki, nə qədər ədalətsiz və qərəzlidirlər”.
Bölmənin digər xəbərləri
