İslam maliyyəsinə dair dərs vəsaitinin təqdimatı olub
Bakı, 20 dekabr, AZƏRTAC
İqtisadi İslahatların Təhlili və Kommunikasiya Mərkəzi (İİTKM) ilə Azərbaycan İlahiyyat İnstitutunun (Aİİ) birgə hazırladığı “İslam maliyyə sistemi və onun Azərbaycandakı perspektivləri” adlı dərs vəsaitinin təqdimatı keçirilib.
AZƏRTAC xəbər verir ki, tədbirdə İlahiyyat İnstitutunun rektoru Aqil Şirinov İİTKM ilə əməkdaşlığın əhəmiyyətindən, eləcə də bu əməkdaşlığın nəticəsi kimi ortaya çıxan dərs vəsaitinin İslam maliyyəsi ilə bağlı məlumatlılığın təmin edilməsindəki rolundan danışıb. Qeyd edib ki, paralel olaraq müvafiq Tədris Proqramı da hazırlanıb və çap edilib ki, bu da dərs vəsaitinin praktiki əhəmiyyətini daha da artırır.
İİTKM-in icraçı direktoru, professor Vüsal Qasımlı İslam maliyyəsinə aid kitabın yazılmasının günümüzün reallığından irəli gələn bir zərurət olduğunu vurğulayıb. O bildirib ki, qlobal biznes trendlərinə cavab verən İslam maliyyə sistemi pulun İslam prinsipləri əsasında idarə edilməsidir.
“İslam maliyyəsi iqtisadiyyatın klassik müşküllərindən biri - ədalət, səmərəlilik və azadlıq arasında çözümün yolunu göstərən həllərdəndir. Maraqlıdır ki, İslam maliyyə sektoru Cənub-Cənub, Şimal-Cənub və Üçbucaq əməkdaşlıq formatları daxilində qlobal trendlərə adaptasiya olunur və resursların, bilik və təcrübənin ədalətli bölgüsünü təşviq edir. İslam maliyyəsi BMT-nin Dayanıqlı İnkişaf Məqsədləri ilə həmahənglik təşkil etməklə, ESG (ətraf mühit, sosial və idarəetmə) çərçivəsində sosial məsuliyyəti təlqin edir, yaşıl və davamlı məhsullara, xüsusilə də yaşıl sukuka marağı artırır. İqlim dəyişikliyinin gətirdiyi maddi riskləri nəzərə alaraq İslam maliyyə sektoru iqlim liderliyi, strateji iqlim idarəçiliyi, iqlimlə bağlı əməliyyat inteqrasiyası, performansın ölçülməsi və hesabatlılıq, iqlim davamlılığı üzrə əməkdaşlıq və mübadilə kimi prinsiplərə söykənir”, - deyə Vüsal Qasımlı əlavə edib.
Dərs vəsaitinin ön sözünü İslam Əməkdaşlıq Təşkilatının İslam Ölkələri üzrə Statistik, İqtisadi və Sosial Tədqiqat və Təlim Mərkəzinin baş direktoru Zəhra Zümrüd, giriş hissəsini İİTKM-in icraçı direktoru, professor Vüsal Qasımlı yazıb. Kitabın elmi redaktorları Aİİ-nin rektoru, dosent Aqil Şirinov və kafedra müdiri, dosent Əhməd Niyazov, rəyçiləri isə UNEC İslam Maliyyə Mərkəzinin rəhbəri, professor Zahid Məmmədov və Bakı Dövlət Universitetinin professoru Sərvər Abbasovdur. Vəsait Aİİ-nin Elmi Şurasının qərarı ilə çapa tövsiyə olunub.
Kitabda İslam iqtisadiyyatı, İslam maliyyə sistemi, bu sistemin elementləri və səciyyəvi xüsusiyyətləri kimi məsələlərə aydınlıq gətirilib. Müəlliflər İslam iqtisadiyyatının nəzəri olaraq mahiyyətini və prinsiplərini izah edib, İslam iqtisadiyyatına və İslam maliyyəsinə aid olan “zəkat”, “infaq”, “qərzi-həsən”, “kəffarə” və digər anlayışların sosial-iqtisadi aspektlərini aydınlaşdırıblar.
Təqdimatda çıxış edənlər Dini Qurumlarla İş üzrə Dövlət Komitəsinin sədr müavini Səyavuş Heydərov, millət vəkili Ceyhun Məmmədov, Qafqaz Müsəlmanları İdarəsinin sədr müavini Fuad Nurullayev və digərləri kitabın əhəmiyyətindən danışıblar.
Bölmənin digər xəbərləri
