İslamofobiyaya qarşı mübarizədə multikultural dəyərlər mövzusuna həsr olunmuş debat
Bakı, 30 may, AZƏRTAC
Mayın 30-da İslam Əməkdaşlıq Gənclər Forumunun (İƏGF) Avrasiya Regional Mərkəzinin (İƏGF Avrasiya Regional Mərkəzi) və “Vətəndaş Cəmiyyətində Debat” İctimai Birliyinin birgə təşkilatçılığı ilə Azərbaycan Dövlət İqtisad Universitetində müxtəlif ali məktəblərimizdən olan 60 tələbənin iştirakı ilə Avrasiya Müsəlman Ölkələrinin Beynəlxalq Debat Çempionatının növbəti milli mərhələsi keçirilib.
İƏGF-dan AZƏRTAC-a bildiriblər ki, İslam Əməkdaşlıq Gənclər Forumu Avrasiya Regional Mərkəzi təşəbbüsü ilə iki ildir Azərbaycanda və Avrasiyanın bir sıra ölkələrində debat çempionatları keçirilir. Builki debat çempionatları Ümummilli Lider Heydər Əliyevin anadan olmasının 100 illiyinə həsr olunub və əsas məqsəd gənclərin natiqlik, kommunikasiya və liderlik bacarıqlarının artırılmasına töhfə vermək, eləcə də Heydər Əliyev şəxsiyyətinin daha geniş auditoriyada tanınmasına nail olmaqdır.
Tədbirin açılış mərasimində İƏGF Avrasiya Regional Mərkəzinin baş direktoru vəzifəsini icra edən Vüsal Qurbanov tədbir iştirakçılarını salamlayaraq, debat çempionatında müzakirə olunacaq mövzunun əhəmiyyətindən danışıb, Ümummilli Liderin 100 illiyinə həsr olunmuş bu çempionatın artıq Qazaxıstan və Qırğızıstanda keçirildiyini və bu ölkələrdə gənclər arasında Heydər Əliyevin natiqlik bacarığının və liderlik keyfiyyətlərinin öyrənilməsini nəzərə çatdırıb, eləcə də təmsil etdiyi qurumun fəaliyyəti, xüsusilə, islamofobiyaya qarşı apardığı mübarizə haqqında qısa məlumat verib.
“Vətəndaş Cəmiyyətində Debat” ictimai birliyinin sədri Ülviyyə Axundova çıxışında keçən ildən etibarən debat çempionatı layihəsi çərçivəsində İƏGF Avrasiya Regional Mərkəzi ilə əməkdaşlıqdan qürur duyduğunu bildirib və iştirakçıları islamofobiya mövzusunda keçiriləcək debatlarda aktiv olmağa çağırıb.
İki gün ərzində Azərbaycan və ingilis dillərində keçirilmiş debat çempionatının əsas mövzusu “Cəmiyyətdə multikultural dəyərlərin olması islamofobiyanın qarşısını alan əsas faktordur” olub.
Sözügedən çempionatda xüsusi istedad və bacarıq nümayiş etdirmiş komandalar və gənclər yaxın zamanlarda pul vəsaiti, qaliblərsə medallar və xüsusi hədiyyələrlə mükafatlandırılacaq.
Debat çempionatlarının əsas məqsədi Avrasiya məkanında yaşayan gənclərdə debat mədəniyyəti və bacarıqlarının inkişaf etdirilməsi, onların liderlik və təmsilçilik qabiliyyətlərinin artırılması, eləcə də gənclərin ictimai-siyasi sahədə fəaliyyətinə töhfə verməkdir.
İƏGF Avrasiya Regional Mərkəzi 2023-cü il ərzində bu layihənin Avrasiyanın bir sıra ölkələrində keçirilməsini planlaşdırır.
Bölmənin digər xəbərləri
