İspan nəşri: Makron ən təcrid olunmuş prezidentdir
Bakı, 14 avqust, AZƏRTAC
Ən problemli şəxsi qərarlarının qurbanı olan Emmanuel Makron Fransanın davamlı hal almaq riski daşıyan institusional iflicini dərinləşdirir və iri sənaye ölkələri demokratiyaları arasında ən təcrid olunmuş dövlət başçısına çevrilir.
AZƏRTAC xəbər verir ki, bu fikirlər İspaniyanın ABC nəşrində dərc olunmuş məqalədə yer alıb.
Makron Baş nazir səlahiyyətlərini icra edən, iyunun 30-da və iyulun 7-də keçirilən növbədənkənar seçkilərdə uğursuzluqdan sonra istefa verən hökumətin başçısı Qabriel Attal ilə nə açıq şəkildə, nə də özəl olaraq əlaqə saxlamır. Nəşr qeyd edir: “Bu, bataqlığa düşmüş Fransa hökuməti üçün görünməmiş bir tamaşadır”.
Olimpiya Oyunlarının başa çatmasından sonra istefa verən daxili işlər nazirləri Jerald Darmanin, iqtisadiyyat naziri Bruno Le Mer və xarici işlər naziri Stefan Sejurne böyük təvazökarlıqla vurğulayıblar ki, onlar gələcək hökumətin mümkün varislərinin adlarını belə fərziyyə şəklində təqdim etmədən əşyalarını yığırlar. Bu Kabinetin nə vaxt formalaşacağı da məlum deyil.
Altı həftə ərzində ifrat solçular, kommunistlər, ekoloqlar, sosialistlər, liberallar və mühafizəkarlar koalisiya hökumətinin Baş naziri vəzifəsinə onlarla namizəd təqdim ediblər. Makron Olimpiya atəşkəsini bəhanə edərək, bütün təklifləri rədd edib.
ABC qeyd edir ki, Emmanuel Makron tərəfindən yaradılan liberal siyasi koalisiya olan “Ensemble” (“Together”) daxilində prezident tənhalığı qorxuya və hissediləcək həmrəyliyin yoxa çıxmasına səbəb olur. Olimpiada zamanı Makron özünü Fransanın prezidenti, nəhəng qlobal tamaşanın qəhrəmanı kimi təqdim edə bildi. Oyunların başa çatması ilə prezidentin tam şəkildə tənhalığı milli və beynəlxalq gələcəyi təhdid edir.
Politoloq Paskal Perrinonun fikrincə, Makron milli təcriddən çıxıb hökumət başçısı təyin etməyə müvəffəq olanda, ən çətin məsələ - ölkəni idarə etmək bacarığı həll olunmamış qalacaq.
ABC nəşrinə görə, Milli Assambleyanın (MŞ) növbəti sessiyasının oktyabrın ortalarında başlaması planlaşdırılır. Həll olunmayan ilk vəzifə isə 2025-ci il dövlət büdcəsinin təsdiqi olacaq. Xalq Cəbhəsi Partiyasının üzvləri ilk etimadsızlıq səsverməsinin gündəliyə salınmasını elan ediblər.
İspaniya nəşri vurğulayır: “Bu təcrid Fransa prezidentinin beynəlxalq arenada görünməmiş təcrid mənzərəsini işıqlandıracaq. Olimpiya Oyunlarının inanılmaz tamaşasından sonra Avropanın sənaye və hərbi suverenliyini müdafiə edən adam milli suverenliyi müdafiə etmək üçün çox pis vəziyyətdədir”.
Bölmənin digər xəbərləri
