İspaniya saytında Azərbaycanın koronavirusla mübarizə istiqamətində gördüyü işlərdən bəhs edilib
Bakı, 5 dekabr, AZƏRTAC
İspaniya saytında Azərbaycanda COVID-19 pandemiyası ilə aparılan mübarizədən və 44 günlük Vətən müharibəsindən bəhs olunub.
Diasporla İş üzrə Dövlət Komitəsindən AZƏRTAC-a bildiriblər ki, bu ölkənin www.tuvozenpinares.com xəbər saytına müsahibəsində İspaniya Azərbaycanlıları Assosiasiyası Birliyinin rəhbəri Vahid İmanov qeyd edib ki, Azərbaycan dövləti koronavirus pandemiyası ilə mübarizə istiqamətində ciddi addımlar ataraq əhalinin kütləvi şəkildə bu xəstəliyə yoluxmasının qarşısını almağa və onların sağlamlığını qorumağa çalışır.
Qeyd edib ki, bu çətin dönəmdə Azərbaycan dövləti təkcə qlobal pandemiya ilə deyil, həm də işğalçı Ermənistanın ölkəmizə hücumunun qarşısını almaq məqsədilə 44 günlük Vətən müharibəsi aparmağa da məcbur olub. Nəticədə 30 ilə yaxın davam edən erməni işğalına son qoyulub. İndi isə Azərbaycan, həm də ermənilər tərəfindən tamamilə məhv edilmiş şəhərlərdə normal həyatın bərpa olunması və məcburi köçkünlərin öz doğma evlərinə geri qaytarılması üçün infrastrukturun yaradılması işləri ilə məşğuldur.
Soydaşımız İspaniya hökumətinin hər zaman Azərbaycanın haqlı mövqeyini dəstəklədiyini də vurğulayıb.
Bölmənin digər xəbərləri
