İsveç polisi: Hər il minlərlə qadın zorakılığa məruz qalır
Stokholm, 26 noyabr, Nərgiz Cəfərli, AZƏRTAC
İsveçdə hər il minlərlə qadın zorakılığa məruz qalır və təxminən on nəfər həlak olur. Polis bu cür ağır cinayətlərin qarşısını almaq üçün yaxınlarının həyatına təhlükə yaradan kişilərin aşkara çıxarılmasında sistemli iş aparır.
AZƏRTAC xəbər verir ki, belə şəxslərin axtarışı zamanı, tədqiqatlara görə, ciddi və ya ölümcül zorakılıqla ən çox əlaqəli olan amillər nəzərə alınır. Ən həyəcanverici əlamətlərə intihar cəhdləri və ya intihar təhdidi, eləcə də qurbanı boğma halları daxildir.
Polis təhlükəli kişilərin dörd kateqoriyasını müəyyən edib:
Xroniklər - ən böyük qrup. Onlar uzun müddət məişət zorakılığı törədirlər və nizamlı həyat tərzi sürən kimi görünürlər.
Görünməyənlər - qatillər arasında ən çox rast gəlinənlər. Onlar əsasən polis tərəfindən tanınmırlar, digər cinayətkar qrupların üzvlərindən daha yaşlıdırlar və onların ruhi sağlamlıq problemləri ola bilər.
Multikriminal olanlar - geniş cinayət tarixçəsi və çoxsaylı qurbanları olan ən kiçik qrupdur.
Münaqişəli kişilər - ən gənc kateqoriyadır və evdən kənarda da daxil olmaqla zorakılığa və impulsiv reaksiyalara meyillidir.
Polis rəisinin müavini Stefan Hektorun sözlərinə görə, müxtəlif kateqoriyalar üzrə fərqli tədbirlərin görülməsi lazımdır. Məsələn, yaxınlaşmağa qadağa “xroniklər” üçün daha yaxşı işləyir, “multikriminallar” isə dialoqa zəif reaksiya verirlər. O, ən təhlükəli kişilərin çoxunun hüquq-mühafizə orqanları tərəfindən aşkarlanmadığını vurğulayır və bu da polis, tibb işçiləri və sosial xidmətlər arasında əməkdaşlığı olduqca vacib edir.
Bölmənin digər xəbərləri
