İsveçdə Saami parlamentinə seçkilər keçirilir
Stokholm, 18 may, AZƏRTAC
Mayın 18-də, bazar günü İsveçdə Saami parlamentinə seçkilər keçirilir. Yerli Fin-uqor xalqının qanunverici orqanına seçkilərdə 9755 nəfər səsvermə hüququna malikdir.
AZƏRTAC xəbər verir ki, səsvermə şimalda Karesuandodan cənubda Stokholma qədər 21 seçki məntəqəsində aparılır. 2021-ci il seçkilərində “Saami ovçular və balıqçılar” partiyası 37 faizdən çox səs toplayaraq lider olub. Aprel ayında keçirilən sorğuya görə, partiyanın yenə də üstünlük əldə edəcəyi görünür, hər on seçicidən dördündən çoxu ona səs verməyə hazırdır.
Bu seçkidə əsas məsələlərdən biri kimin Saami icmasına (sameby) mənsub olmaq hüququna malik olması ilə bağlı münaqişədir. Bu məsələdə “Saami ovçular və balıqçılar” partiyasına qarşı ən böyük müxalifət olan Sami Ölkə Partiyasının mövqeləri köklü şəkildə fərqlidir.
“Saami ovçular və balıqçılar” partiyası yenidən səs çoxluğu qazana bilsə, onun sədri Hokan Yunsson Saami icmasına kimin aid ola biləcəyi ilə bağlı qanunun dəyişdirilməsinə təkan vermək niyyətindədir. O, bu məsələni “Saami Parlamentini yarıya bölən endirən bıçaq” adlandırıb.
Saami parlamenti həm Saami mədəniyyəti ilə bağlı məsələlər üzərində işləmək vəzifəsi daşıyan seçilmiş bir orqan, həm də inzibati funksiyaları olan dövlət qurumudur. Plenum adlanan seçilmiş məclis 31 deputatdan ibarətdir. Seçkilər 1993-cü ildən bəri dörd ildən bir keçirilir.
Parlament, həmçinin Saami torpaqlarının istifadəsi, şəhərsalma, maralçılıq, vəhşi təbiətin mühafizəsi, ətraf mühit, iqlim və biomüxtəlifliyə aid məsələlərlə də məşğul olur.
Səslərin hesablanmasına seçki günündən bir həftə sonra başlanacaq, yekun nəticələrin mayın 28-dən gec olmayaraq açıqlanacağı gözlənilir.
Bölmənin digər xəbərləri
