İsveçrə qəzeti Angela Merkelin yubileyindən yazıb
Bakı, 16 iyul, AZƏRTAC
Angela Merkelin iyulun 17-də qeyd olunacaq 70 illik yubileyi ərəfəsində İsveçrənin alman dilində nəşr olunan “Neue Zürcher Zeitung” qəzeti Almaniyanın sabiq kanslerinə həsr olunmuş məqalə dərc edib.
AZƏRTAC xəbər verir ki, İsveçrə nəşri Merkelin siyasətdə ikiqat autsayder olduğunu vurğulayır: o, qadın və Şərqi Almaniyadan olan almandır, lakin bunların heç biri haqqında danışmağı xoşlamırdı.
Məqalədə qeyd olunur ki, Almaniyada kanslerin 2013-cü ildə üçüncü parlament seçkiləri kampaniyası zamanı istifadə etdiyi tanış “Sən məni tanıyırsan” ifadəsi Angela Merkelin 16 illik hakimiyyətini və almanlara münasibətini ən yaxşı şəkildə xarakterizə edir: biz ona səs veririk və o, qarşılığında hər şeyin olduğu kimi qalmasını təmin edir.
Qəzet yazır: “Bu ifadə həm də onu göstərir ki, Almaniyanın ilk qadın kansleri hər hansı bitkini hələ tumurcuqlamadan məhv edən alman torpağında kök salıb. BBC-nin bir məqaləsinə görə, bir vaxtlar onu hətta “Almaniya kraliçası” və “Avropa İmperatoru” da adlandırırdılar”.
İsveçrə qəzeti oxucuların diqqətinə çatdırır ki, yubiley şərəfinə ARD telekanalı Angela Merkel haqqında sənədli film nümayiş etdirəcək və bu ekran əsəri onun özünün səsləndirdiyi “Sən məni tanıyırsan” ifadəsi ilə başlayır.
“Neue Zürcher Zeitung” yazır: “Angela Merkelin kim olduğu sualına bu ad günü şənliyində müvafiq olaraq cavab verilir: heç bir xoşagəlməz həqiqəti bəzəkli kağıza büküb gizlətmək mümkün deyil. Sadəcə, ortalıqda istehzalı vurğular qalır”. Almaniyanın sabiq kansleri haqqında fikirlərini bölüşəcək şəxslər arasında onun bioqrafı Evelin Roll və publisist Kristof Dikman da var.
“Neue Zürcher Zeitung” (“Yeni Sürix qəzeti”) ölkənin ən qədim gündəlik qəzetidir və 1780-ci ildən Sürixdə nəşr olunur. Qəzet İsveçrənin almandilli oxucuları arasında aparıcı media orqanlarından biri hesab edilir.
Bölmənin digər xəbərləri
