İtaliyada yaşayan azərbaycanlı bəstəkarın “Üzeyir Hacıbəyli Şuşaya qayıdır” əsəri Bakıda səsləndirilib
Bakı, 10 oktyabr, AZƏRTAC
İtaliyada yaşayan azərbaycanlı bəstəkar Kəmalə Əlizadənin mədəniyyət paytaxtımız Şuşaya həsr olunmuş “Üzeyir Hacıbəyli Şuşaya qayıdır” əsəri Bakıda təqdim edilib.
Diasporla İş üzrə Dövlət Komitəsindən AZƏRTAC-a bildirilib ki, bəstəkar kompozisiyanı Şuşa azad ediləndən dərhal sonra simli kvartet və fortepiano üçün yazdığını deyib. Qeyd olunub ki, görkəmli Azərbaycan bəstəkarı Üzeyir Hacıbəylinin doğma yurda qayıdışını simvolizə edən əsər dahi bəstəkarın “Arşın mal alan” operettası və “Sənsiz” romansı mövzuları əsasında yazılıb.
“Şuşanın işğaldan sonra bəstəkara necə göründüyünü göstərmək istədim. Bu, dağılmış, bizim üçün darıxan Şuşadır”, - deyə bəstəkar vurğulayıb.
Üzeyir Hacıbəyli adına XV Beynəlxalq musiqi festivalında səsləndirilmiş əsər Kəmalə Əlizadə (fortepiano), Ceyla Seyidova (1-ci skripka), Soltan Məmmədov (2-ci skripka), Vaxtanq İmanov (alt) və Aleksey Miltıxın (violonçel) ifasında təqdim olunub.
Qeyd edək ki, Bakı Musiqi Akademiyasında görkəmli bəstəkar Arif Məlikovun sinfini bitirmiş K.Əlizadə təhsilini İtaliyada (İstituto Superiore di Studi Musicali) davam etdirib. Bəstəkar həyat yoldaşı, italiyalı bəstəkar, musiqişünas Stefano Muskaritolo ilə birlikdə xaricdə Azərbaycanla bağlı layihələr həyata keçirir.
Bölmənin digər xəbərləri
