İtaliyada yeni təhlükəsizlik qanunu təsdiqlənib
Roma, 5 aprel, AZƏRTAC
İtaliyada təhlükəsizliklə bağlı yeni qanun layihəsi qəbul olunub.
AZƏRTAC xəbər verir ki, Baş nazir Ciorcia Meloninin sədrliyi ilə keçirilən Nazirlər Şurasının iclasında təxminən il yarımdır müzakirə olunan təhlükəsizliklə bağlı qanun layihəsinə dəyişiklik edilməsi haqqında fərman təsdiqlənib.
Yeni qanunla asayiş keşikçilərinə hücum edənlərlə bağlı cəzalar, eləcə də təhlükəsizlik qüvvələrinin hüquqi təminatları artırılacaq. Həmçinin dəmir yolu və metro kimi nəqliyyat sektorunda işçilərə qarşı zorakılıq tətbiq edənlər bu cür ictimai xidmətlərdən ömürlük uzaqlaşdırılacaq.
Bundan əlavə, keçirilən aksiyalarda nəqliyyat vasitələrinin keçməsinə mane olan iqlim fəallarını 2 ilədək həbs cəzası gözləyir.
Baş nazir deyib ki, yeni təhlükəsizlik qanununda cinayətkarlara qarşı daha sərt tədbirlər nəzərdə tutulur, eyni zamanda, vətəndaşların təhlükəsizliyini qorumaq üçün bir çox başqa tədbirlər də görüləcək. O bildirib ki, hökumət təhlükəsiz İtaliya yolunda bundan sonra da qətiyyətlə fəaliyyət göstərəcək.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
