Kamilə Əliyeva: Azərbaycan xalqı dünyada əzmkar, qürurlu xalq kimi tanınır
Bakı, 9 noyabr, AZƏRTAC
Müzəffər Ali Baş Komandan, Prezident İlham Əliyev dövlətimizin başçısı seçildiyi ilk vaxtlardan müqəddəs amal uğrunda - işğal altında qalan torpaqlarımızı azad etmək üçün yorulmadan, usanmadan çalışdı. Dövlətimizin başçısının müdrik və uzaqgörən siyasətinin nəticəsində Azərbaycanın ərazi bütövlüyü təmin edildi, xalqımız dünyada əzmkar, qürurlu xalq kimi tanındı.
AZƏRTAC xəbər verir ki, bunu Milli Məclisin deputatı, BDU-nun kafedra müdiri, professor Kamilə Əliyeva deyib.
Deputat vurğulayıb ki, Vətən müharibəsində qazandığımız qələbəmizi şərtləndirən amillərdən biri də məhz Prezident İlham Əliyevin Azərbaycanı iqtisadi cəhətdən güclü bir dövlətə çevirməsi oldu. Məhz bu dayanıqlı iqtisadiyyat nəticəsində Azərbaycan Ordusu dünyanın ən güclü orduları sırasında yer aldı, dövlət büdcəsindən ordumuza kifayət qədər vəsait ayrıldı. Azərbaycan Silahlı Qüvvələri dünyanın ən müasir silahları ilə təchiz edildi. Azərbaycan münaqişə dövründə bütün nüfuzlu beynəlxalq təşkilatlarla əməkdaşlıq etdi və münaqişənin həlli üçün hüquqi baza yaratdı. BMT-nin Baş Assambleyası, Qoşulmama Hərəkatı, Avropa Şurası, Avropa Parlamenti, İslam Əməkdaşlıq Təşkilatı və bir sıra beynəlxalq təşkilatlarda qətnamələr qəbul edildi.
K.Əliyeva bildirib ki, görülən bütün işlər Azərbaycanı qalibiyyətə - 8 noyabr Zəfərinə aparırdı. “Azərbaycan dövlətinin və xalqının qazandığı bu hərbi və siyasi qələbə dünyada öz unikallığı ilə tarixə yazılmış oldu. Dünya tarixində belə bir hadisə olmayıb ki, bir dövlət 30 il işğalda olan torpaqlarını 44 gün ərzində hərbi və siyasi yolla azad etsin. Xalqımız bunu bacardı. Azərbaycan xalqı öz liderinin, Müzəffər Ali Baş Komandan, Prezident İlham Əliyevin rəhbərliyi altında sıx birləşərək bütün dünyaya öz gücünü, mübarizliyini nümayiş etdirdi. 44 gün ərzində Azərbaycan Ordusunun əsgər və zabitləri böyük şücaət və qəhrəmanlıq göstərdi, döyüşlər zamanı bir addım belə geri çəkilmədi. Əsgərlərimiz torpaqlarımız və dövlətimiz naminə öz canlarını əsirgəmədilər. Azərbaycan xalqı həmişə olduğu kimi müharibə zamanı da öz Prezidentinə inandı, onun ətrafında sıx birləşdi, öz ordusunun arxasında dayandı. Bu vəhdət dəmir bir yumruğa çevrildi. Elə bir yumruğa çevrildi ki, bu yumruğu açmağa heç kimin nə gücü, nə də qüdrəti çatmaz.
Prezident İlham Əliyevin hərb meydanında müzəffər sərkərdə olması ilə yanaşı, diplomatik cəbhədə də böyük diplomat və güclü siyasətçi olması öz təsdiqini tapdı.
Prezident İlham Əliyev 44 gün ərzində informasiya sahəsində Azərbaycan xalqının haqq səsi oldu, cəsarətlə, qətiyyətlə bütün xarici təzyiqlərə sinə gəldi və mübarizlik rəmzinə çevrildi. Prezident seçildiyi ilk gündən etibarən dövlətimizin başçısı bir gün də olsun, Qarabağla bağlı xalqımızın ruh düşkünlüyü yaşamasına imkan vermədi. Xalqımız da hər zaman vətən həsrətini, vətən sevgisini ürəyində yaşatdı. Vətəni və dövləti sevməyi və qorumağı hər şeydən üstün tutan gənclərimiz də bu ruhda tərbiyə olundu. Həmin gənclər Vətən müharibəsində qələbəmizi təmin etdilər", - deyə K.Əliyeva vurğulayıb.
Azərbaycanımızın Qarabağa, Şərqi Zəngəzura qovuşduğunu bildirən deputat qeyd edib ki, Azərbaycan Ordusu Xocalı qurbanlarının, müharibədə günahsız qətlə yetirilmiş mülki əhalimizin, şəhidlərimizin qisasını döyüş meydanında aldı. Biz bütün dünyaya əzmkar və qürurlu xalq olduğumuzu sübut etdik.
Böyük Zəfərimizdən dərhal sonra bərpa və quruculuq işlərinə başlanıldığını və Böyük Qayıdış prosesinə start verildiyini bildirən Kamilə Əliyeva deyib: “Dünya azərbaycanlılarının lideri Prezident İlham Əliyev ölkəmizi bundan sonra da böyük zirvələrə aparacaq. Xalqımız öz liderinə inanır və onun ətrafında sıx birləşib”.
Bölmənin digər xəbərləri
