MƏDƏNİYYƏT
Kəmalə Kamal: Məqsədimiz Azərbaycan mədəniyyətinin Türkiyədə təbliğinə töhfə verməkdir
İstanbul, 17 yanvar, AZƏRTAC
“Xarıbülbül” Azərbaycan Vizyon Teatr Birliyi olaraq peşəkar kollektivimizlə Türkiyədə bir çox layihələr həyata keçirmişik. Fəaliyyət göstərdiyimiz ötən doqquz il ərzində Azərbaycan ilə Türkiyə arasında mədəniyyət körpüsü olmağa çalışaraq, iki qardaş ölkə incəsənətini bir dam altında birləşdirə bildik. Birliyimiz təkcə səhnə əsərləri ilə bağlı deyil, eyni zamanda, əl işləri sərgilərinin təşkili, sənədli filmlərin çəkilişi, ölkələrimiz üçün əlamətdar günlərə həsr olunan tədbirlərin və bir sıra layihələrin həyata keçirilməsini əhatə edir. Əsas məqsədimiz sənətimizlə yanaşı, tariximizi də qorumaq, Azərbaycan mədəniyyətinin Türkiyədə daha geniş təbliği və gələcək nəsillərə ötürülməsində rol oynamaqdır. Azərbaycan və Türkiyə arasında möhkəm dostluq nəticəsində yaranan bu öhdəlik keçmişin, bu günün və gələcəyin gözəl nümunələrindən biridir.
Bu fikirləri “Xarıbülbül” Azərbaycan Vizyon Teatr Birliyinin rəhbəri, aktrisa Kəmalə Kamal Cabbarova AZƏRTAC-a müsahibəsində deyib.
“Bəzən siyasətin dili ilə fikrimizi tam çatdıra bilmədiyimiz insanlar bunu mədəniyyətin dili ilə daha yaxşı başa düşür, daha çox mənimsəyirlər. Məsələn, Xocalı soyqırımı tarix durduqca azərbaycanlıların qanayan yarası olacaq. Ali Baş Komandanımızın rəhbərliyi ilə Azərbaycan Ordusunun işğal altındakı torpaqlarımızı azad etməsi, üçrəngli Bayrağımızın tarixi torpaqlarımızda yenidən ucaldılması bu yaramıza sözün əsl mənasında su səpdi. Lakin dünyada bu faciədən hələ də xəbərsiz olan insanlar var. Elə bu səbəbdən də mənim təşəbbüsümlə 2015-ci ildə Azərbaycan Dövlət Musiqili Teatrının aktyoru Elçin İmanov, TURAN teleteatrı, “Uşaqların Gələcəyi Naminə” İctimai Birliyinin dəstəyi ilə “Xocalı” layihəsi ilə Türkiyəyə gəldik və iki qardaş ölkə arasında mədəni körpü olan Vizyon Teatrını qurduq. Bu teatrın ifasında da İstanbulda Xocalı soyqırımı ilə bağlı tamaşanı səhnələşdirdik, orada yaşanan dəhşəti mədəniyyətin dili ilə göstərməyə çalışdıq. Soyqırımının dəhşətlərini bundan xəbərsiz və ya daha az məlumatı olan bir insana belə çatdıra bildiksə, bu, bizim üçün qürurvericidir. Sonra isə “Xarıbülbül” Azərbaycan Vizyon Teatr Birliyi yaradıldı”, - deyə müsahibimiz bildirib.
Bu il bir çox yeni layihəni həyata keçirməyi hədəflədiklərini qeyd edən aktrisa deyib: “Bu il bir neçə tədbir, o cümlədən sərgi, tamaşa və yaradıcılıq gecəsi keçirməyi nəzərdə tuturuq. Bütün bunlarla yanaşı, balaca tamaşaçılarımızı da unutmuruq. Onlar üçün “Qırmızı başlıqlı qız”, “Tıq-tıq xanım”, “Şişko”, “Davud” kimi uşaq tamaşalarını İstanbulun müxtəlif səhnələrində nümayiş etdirəcəyik”.
Aktrisa deyib: “Sənətin dili, irqi, siyasi baxışı, mənsubiyyəti yoxdur. Mədəniyyət nümayəndələri olaraq yeganə məqsədimiz insanlara sənətimizlə xeyirxahlıq, gözəllik, sevgi aşılamaq və bəzi həssas məqamlarla bağlı onları məlumatlandırmaqdır. Fikrimcə, Türkiyədə belə bir teatrın qurulması və fəaliyyətinin davam etdirilməsi olduqca vacibdir”.