KƏND TƏSƏRRÜFATI NAZİRLİYİ İLƏ DÜNYA BANKI ARASINDA YENİ SAZİŞ İMZALANMIŞDIR
Sənədi kənd təsərrüfatı naziri İsmət Abasov və DB-nin Azərbaycan üzrə meneceri Qreqori Yedjeyçak imzalamışlar.
Layihənin icrası üçün tələb olunan 58 milyon ABŞ dollarının 30 milyonu DB, 1,6 milyonu Yaponiya hökuməti (xüsusi qrant şəklində), yerdə qalanı isə Azərbaycan hökuməti tərəfindən ayrılmışdır. Beynəlxalq İnkişaf Assosiasiyasının şərtləri əsasında verilmiş kreditin müddəti ilk 10 ili güzəştli olmaqla 35 ildir.
Q.Yedjeyçak məlumat vermişdir ki, bu layihə DB tərəfindən təsdiq olunmuş və 10 illik Uyğunlaşdırılmış Kredit Proqramının ikinci mərhələsidir. Əsas məqsəd kənd təsərrüfatı müəssisələrini dəstəkləmək, aqrar məqsədlər üçün kredit verən yerli bank və lizinq şirkətlərinin potensialını gücləndirmək, məhsuldarlığı və kənd əhalisinin gəlirlərini artırmaq, maliyyə, məsləhət və baytarlıq xidmətlətini təkmilləşdirməkdir.
Beynəlxalq qurumların Azərbaycana göstərdiyi etimadı yüksək qiymətləndirən İsmət Abasov bundan sonra da DB ilə sıx əməkdaşlıq edəcəklərinə ümidvar olduğunu diqqətə çatdırmışdır. Onun sözlərinə görə, bu dəfəki layihə bütün regionları əhatə edəcəkdir.
Layihənin icrasına gələn ilin əvvəllərindən başlanılacaqdır.
Bölmənin digər xəbərləri
