Kənd Təsərrüfatı Nazirliyinin Çağrı Mərkəzinin elektron sistemi təkmilləşdirilib
Bakı, 3 fevral, AZƏRTAC
Kənd Təsərrüfatı Nazirliyinin 1652 nömrəli Çağrı Mərkəzi elektron sistemi təkmillləşdirilib.
Nazirliyin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, sistemin təkmilləşdirilməsində məqsəd vətəndaş müraciətlərinin cavablandırılmasında operativliyin və xidmət keyfiyyətinin artırılması, xidmət səviyyəsinin ölçülməsi və vətəndaş məmnunluğunun təmin edilməsidir.
1652 nömrəli Çağrı Mərkəzi həftənin iş günləri saat 09:00-dan 18:00-dək fasiləsiz olaraq canlı rejimdə fəaliyyəti göstərir.
Dövlətin sosial-iqtisadi potensial göstəricilərindən biri kimi müasir kommunikasiya texnologiyalarının inkişaf səviyyəsi və tətbiq dairəsi özlüyündə vətəndaş məmnuniyyətinə əsaslanan idarəetməni dövlət siyasətinin prioritetlərindən birinə çevirib.
2015-ci ildən fəaliyyətə başlayan Kənd Təsərrüfatı Nazirliyinin 1652 nömrəli Çağrı Mərkəzi yarandığı gündən vətəndaşların müraciətlərinə operativ qaydada baxılması, müraciətləri üzrə onlara tam və hərtərəfli izah verilməsi və vətəndaş məmnunluğunun təmin edilməsi üçün xidmət göstərir. Fəaliyyəti zamanı iş keyfiyyətinin artırılması və çatışmazlıqların müyyən edilərək aradan qaldırılması istiqamətində mütəmadi olaraq tədbirlər görülür.
Bölmənin digər xəbərləri
