DÜNYA
KİPRDƏ İCMALARARASI DANIŞIQLARA BİRGÜNLÜK FASİLƏ VERİLMİŞDİR
AZƏRTAC-ın xarici informasiya vasitələrindən aldığı xəbərə görə, fevralın 25-də yunan-Kipr tərəfi iki hissəyə bölünmüş adada vəziyyətin nizama salınmasına dair BMT-nin himayəsi ilə Nikosiyada keçirilən danışıqlarda birgünlük fasilə götürmüşdür. Buna Kipr türklərinin lideri Rauf Denktaşın bir gün əvvəl irəli sürdüyü gələcək birləşmiş Kipr dövlətinin ikizonalı xarakterini möhkəmləndirmək təklifi səbəb olmuşdur.
Kipr Respublikasının prezidenti və yunan icmasının lideri Tassos Papadopulos BMT baş katibinin bu danışıqlarda xüsusi nümayəndəsi Alvaro de Sotodan Denktaşın təkliflərini diqqətlə nəzərdən keçirmək üçün onunla növbəti görüşünü bir gün təxirə salmağı xahiş etmişdir.
Nikosiyada keçirilən icmalararası danışıqlardan başlıca məqsəd bu ilin martında ikiicmalı və ikizonalı birləşmiş dövlətin yaradılması yolu ilə Kipr probleminin hərtərəfli nizama salınması haqqında sazişin imzalanmasıdır. Sənəd aprel ayında hər iki icmada iki ayrı-ayrı referenduma çıxarılacaq və yalnız bəyənildikdən sonra artıq birləşmiş Kipr bu il mayın 1-də Avropa Birliyinə daxil olacaqdır.