Kiyevdə Xocalı faciəsinin 23-cü ildönümünə həsr edilmiş konsert-rekviyem olub
Kiyev, 26 fevral, AZƏRTAC
Kiyevdə, “Fairmont” qrand-otelinin “Atrium” salonunda Xocalı soyqırımının 23-cü ildönümünə həsr edilmiş konsert-rekviyem olub. Tədbir Azərbaycanın Ukraynadakı səfirliyi, Azərbaycan Respublikası Dövlət Neft Şirkətinin Kiyevdəki nümayəndəliyi və “Ukrayna Azərbaycanlılarının Birləşmiş Diasporu” Ümumukrayna İctimai Təşkilatı tərəfindən təşkil edilib.
Rəsmi hissədə Azərbaycanın Ukraynadakı səfiri Eynulla Mədətli çıxış edib. O, erməni silahlı qüvvələri və onların əliqanlı əlaltıları tərəfindən işğal edilmiş Azərbaycanın Xocalı şəhərində dinc əhali arasında çoxsaylı qurbanlardan söz açıb.
Diplomat vurğulayıb ki, elan edilməmiş və hələ də başa çatmamış müharibədə Azərbaycan xalqı 20 min oğul və qızını itirib. Ukraynalı Oleq Babak, Ruslan Polovinka, Viktor Seryoqin də həlak olanlar arasındadır. Onlar Sovet İttifaqı Qəhrəmanı və Azərbaycan Respublikasının Milli Qəhrəmanı adlarına layiq görülüblər.
Təəssüf ki, atəşkəsə baxmayaraq, itkilərimiz hələ də davam edir. Azərbaycan ərazilərində təmas xəttində hər gün insanlar həlak olur. Ukraynanın müstəqilliyi və birliyinin qorunub saxlanılması yolunda qurban gedənlərin sayı da artıq minlərlədir. Əlbəttə, bu, unudulmaz ağrı və kədərdir, amma eyni zamanda Vətəni müdafiəyə səsləyən çağırışdır.
Səfir çıxışının sonunda həlak olmuş xocalılıların, Azərbaycanın və Ukraynanın bütün günahsız qurbanlarının və qəhrəman şəhidlərinin xatirəsini bir dəqiqəlik sükutla anmağı xahiş edib.
Sonra konsert-rekviyem olub. Konsertdə Azərbaycan və xarici bəstəkarların, o cümlədən Qara Qarayevin, Fikrət Əmirovun, Vaqif Mustafazadənin, Aleksandr Çaykovskinin və başqalarının əsərləri dünya səviyyəli dirijor və violonçelçalan, Qəbələ Beynəlxalq Musiqi Festivalının həmsədri Dmitri Yablonskinin idarə etdiyi “Kiyev solistləri” Milli Kamera Ansamblının, habelə Azərbaycanın Əməkdar Artisti Şəhriyar İmanovun (tar) ifasında səslənib.
Ukraynanın Xalq Artisti, tamaşaçılara 1962-ci ildə “Azərbaycanfilm” kinostudiyasında lentə alınan “Telefonçu qız” filminin baş qəhrəmanı Mehriban rolundan yaxşı tanış olan Raisa Nedaşkovskaya, Ukraynanın Xalq Artisti Qurban Abbasov və Kiyev Filarmoniyasının solisti Tatyana Şkolnaya da konsert-rekviyemdə çıxış ediblər.
“Atrium” salonunda Heydər Əliyev Fondu və Azərbaycanın Ukraynadakı səfirliyi tərəfindən Ukrayna dilində nəşr olunmuş, Ermənistan-Azərbaycan, Dağlıq Qarabağ münaqişəsindən, o cümlədən Xocalı soyqırımından söz açan kitablar nümayiş etdirilib.
Həmvətənimiz, Ukraynanın xalq deputatı, Ali Radanın Vergi və Gömrük Siyasəti Məsələləri Komitəsinin başçısı, Ukrayna-Azərbaycan parlamentlərarası əlaqələr üzrə işçi qrupunun sədri Roman Nəsirov AZƏRTAC-a müsahibəsində bildirib ki, harada yaşayırsa-yaşasın, hər bir azərbaycanlı öz xalqının faciəsini, o cümlədən Xocalı soyqırımını xatırlamağa borcludur. Ukrayna ictimaiyyətinin Azərbaycan xalqının Xocalı qırğını kimi faciəli səhifəsi barədə məlumatı azdır. Roman Nəsirov xüsusi vurğulayıb ki, bu cür tədbirləri təşkil edən Azərbaycanın Ukraynadakı səfirliyi, Xarkovdakı fəxri konsulluğu və diaspor təşkilatları sayəsində Ukrayna cəmiyyəti getdikcə daha məlumatlı olur, Ermənistan-Azərbaycan, Dağlıq Qarabağ münaqişəsinin səbəblərini və təfərrüatını öyrənir.
Tədbirdə Ukraynanın siyasi isteblişmentinin, Kiyevdə akkreditə olunan diplomatik korpusun, Kiyev Hərbi Attaşelər Assosiasiyasının, Ukrayna ictimaiyyətinin nümayəndələri, Azərbaycanın dövlət şirkətlərinin Ukraynadakı nümayəndəliklərinin rəhbərləri, diasporumuzun təmsilçiləri və Türkiyə jurnalistləri iştirak ediblər.
Zeynal Ağazadə
AZƏRTAC -ın xüsusi müxbiri
Kiyev
Bölmənin digər xəbərləri
